អ្នកស្រុករដ្ឋ New South Wale (NSW) របស់ប្រទេសអូស្រា្តលី រាប់រយនាក់បានធ្វើការអំពាវនាវរកជំនួយ នៅពេលមានភ្លៀងធ្លាក់ខ្លាំងវាយប្រហាររដ្ឋនេះ ដែលបណ្តាលឱ្យផ្នែកដ៏ធំនៃតំបន់ប្រឈមនឹងគ្រោះទឹកជំនន់ ខណៈទីក្រុងស៊ីដនី បានជួបប្រទះថ្ងៃដែលមានភ្លៀងធ្លាក់ខ្លាំងបំផុតរបស់ខ្លួននៃឆ្នាំ រហូតមកដល់បច្ចុប្បន្ននេះ។

សាកសពបុរស ២នាក់ដែលដំបូងឡើយបានបាត់ខ្លួន ត្រូវរកឃើញក្នុងប្រតិបត្តិការស្វែងរក បន្ទាប់ពីរថយន្តមួយគ្រឿងធ្លាក់ចូលក្នុងទន្លេ ចម្ងាយ ២០គីឡូម៉ែត្រ ភាគខាងជើងជាយក្រុង Wisemans Ferry របស់ទីក្រុងស៊ីដនី កាលពីយប់ថ្ងៃពុធ (២០ សីហា)។ នគរបាលរដ្ឋ NSW បាននិយាយថា ភ្លៀងធ្លាក់កាន់តែខ្លាំងកំពុងប៉ះពាល់ដល់កិច្ចខិតខំប្រឹងប្រែងរបស់ភ្នាក់ងារចម្រុះ។

យោងតាមគេហទំព័រតាមដានអាកាសធាតុ Weatherzone បានឱ្យដឹងថា ទីក្រុងស៊ីដនី បានកត់ត្រាកម្រិតទឹកភ្លៀង ៨២មីលីម៉ែត្រ ក្នុងរយៈពេល ២៤ម៉ោង រហូតដល់ព្រឹកថ្ងៃព្រហស្បតិ៍ ២១ សីហា នេះ ច្រើនជាងទឹកភ្លៀងជាមធ្យមប្រចាំខែទាំងមូលសម្រាប់ខែសីហា ក្នុងមួយថ្ងៃ។ សេវាព្យាករអាកាសធាតុនេះក៏និយាយថា នេះជាថ្ងៃដែលមានភ្លៀងធ្លាក់ខ្លាំងបំផុតប្រចាំឆ្នាំ និងប្រចាំខែសីហា របស់ទីក្រុងស៊ីដនី ចាប់តាំងពីឆ្នាំ២០០៧មក។

លោក Steve Bernasconi អ្នកគ្រប់គ្រងការត្រៀមលក្ខណៈគ្រោះថ្នាក់របស់ការិយាល័យឧតុនិយមអូស្រ្តាលី (BoM) បាននិយាយថា ភ្លៀងធ្លាក់រីករាលដាល និងក្នុងកម្រិតមធ្យម រួមទាំងផ្គររន្ទះនឹងបន្តរហូតដល់ម៉ោងក្នុងស្រុក ៩ព្រឹក ថ្ងៃសុក្រ ២២ សីហា ស្អែកនេះ៕