ការពិភាក្សាគ្នារបស់សម្ព័ន្ធមិត្តអំពីការបញ្ជូនកងកម្លាំងរក្សាសន្តិភាពរបស់អឺរ៉ុប ដើម្បីទៅការពារអ៊ុយក្រែន ជាផ្នែកនៃលទ្ធភាពកិច្ចព្រមព្រៀងសន្តិភាពជាមួយរុស្ស៊ី បានបង្កឱ្យមានប្រតិកម្មតបតយ៉ាងច្របូកច្របល់នៅអាល្លឺម៉ង់ ដែលជាប្រទេសមួយនៅតែមានស្លាកស្នាមរបួសដោយអតីតពួកណាហ្ស៊ីនិយមយោធា បើទោះបីជាក្ដីរំពឹងនៃរឿងបែបនេះហាក់មិនអាចកើតឡើងក៏ដោយ។

អធិការបតីអាល្លឺម៉ង់ លោក Friedrich Merz បានបង្ហាញពីការបើកចំហចំពោះការចូលរួមរបស់អាល្លឺម៉ង់ ក្នុងបេសកកម្មរក្សាសន្តិភាពដែលអាចកើតមាននៅអ៊ុយក្រែន ខណៈសង្កត់ធ្ងន់ថា ការសម្រេចចិត្តបែបនេះនឹងតម្រូវឱ្យមានការសម្របសម្រួលជាមួយដៃគូអឺរ៉ុប និងសម្ព័ន្ធចម្រុះនៃរដ្ឋាភិបាលរបស់លោក។

លោកស្រី Alice Weidel ប្រធានបក្សជម្រើសថ្មីសម្រាប់អាល្លឺម៉ង់ (AfD) ស្តាំនិយមជ្រុល បានចោទក្រុមអភិរក្សនិយមរបស់លោក Merz ថាបង្កសង្គ្រាម ទោះជាគ្រាន់តែពិចារណាលើគំនិតដាក់កងទ័ពជើងគោកបែបនេះក៏ដោយ ដោយបានរិះគន់ថា ជំហាននេះជារឿង "គ្រោះថ្នាក់ និងគ្មានភាពទទួលខុសត្រូវ"។

សូម្បីតែរដ្ឋមន្ត្រីការបរទេសរបស់ Merz ផ្ទាល់គឺលោក Johann Wadephul ក៏បានព្រមានថា ការបញ្ជូនទាហានទៅអ៊ុយក្រែន "ប្រហែលជានឹងធ្វើឱ្យអាល្លឺម៉ង់ ពិបាកទប់ទល់ណាស់"។

ភាពមិនស្រួលចិត្តបែបនេះ អាចមកពីអតីតរបបណាហ្ស៊ីរបស់អាល្លឺម៉ង់ និងការដាក់ពង្រាយថ្មីៗទៅកាន់អាហ្វហ្គានីស្ថាន និងម៉ាលី ដែលត្រូវគេមើលឃើញយ៉ាងទូលំទូលាយថាជា ជំហានដ៏បរាជ័យ។ លើសពីនេះ ការមិនពេញចិត្តក៏កើតមានផងដែរ ជុំវិញការចំណាយប្រាក់រាប់ពាន់លានអឺរ៉ូលើជំនួយយោធាអ៊ុយក្រែន នៅពេលសេដ្ឋកិច្ចអាល្លឺម៉ង់ខ្លួនឯងផ្ទាល់កំពុងតែយ៉ាប់យ៉ឺន៕