ឧបនាយករដ្ឋមន្ត្រីទី១ នៃប្រទេសរុស្ស៊ីលោក Denis Manturov បាននិយាយនៅក្នុងកិច្ចប្រជុំនៃគណៈកម្មការអន្តររដ្ឋាភិបាលរុស្ស៊ី-ឥណ្ឌាសម្រាប់កិច្ចសហប្រតិបត្តិការនេះ ប្រទេសរុស្ស៊ី និងឥណ្ឌា បានជំរុញទំហំពាណិជ្ជកម្មរបស់ពួកគេជិត ៧ដង ក្នុងរយៈពេល ៥ឆ្នាំ ចុងក្រោយនេះ។

លោកបាននិយាយថា៖«ដោយសារការសម្រេចចិត្ត ដែលបានធ្វើឡើងមុននេះ ប្រាក់ចំណូលពាណិជ្ជកម្ម  រុស្ស៊ី-ឥណ្ឌា បានកើនឡើងជិត ៧ដង ក្នុងរយៈពេល ៥ឆ្នាំ ចុងក្រោយនេះ។ ឥណ្ឌាមានទំនុកចិត្តក្នុងចំណោមដៃគូពាណិជ្ជកម្មបរទេសធំជាងគេទាំងបីរបស់យើង»។

លោក Manturov បានសង្កត់ធ្ងន់ថា ប្រភេទនៃផលិតផល កំពុងកើនឡើងរួមជាមួយនឹងការកើនឡើងនៃទំហំពាណិជ្ជកម្ម។ បន្ថែមពីលើការផ្គត់ផ្គង់ថាមពលដែលមានស្ថិរភាពដល់ប្រទេសឥណ្ឌា ការនាំចេញរបស់រុស្ស៊ី រួមមានជីរ៉ែ លោហធាតុ និងផលិតផលឧស្សាហកម្មធ្វើពីឈើ ពេជ្រមិនទាន់ច្នៃ ឧបករណ៍ថាមពល និងអាហារ។

ប្រទេសរុស្ស៊ី កំពុងនាំចូលផលិតផលកសិកម្ម ឱសថ និងសារធាតុ ទំនិញឧស្សាហកម្មធុនស្រាល វត្ថុធាតុដើមឧស្សាហកម្ម ឧបករណ៍ និងសមាសធាតុផ្សេងៗពីប្រទេសឥណ្ឌា។

លោក Manturov បាននិយាយថា ការងារបន្តរៀបចំកិច្ចព្រមព្រៀងពាណិជ្ជកម្មសេរីជាមួយឥណ្ឌា។ លោកបានបន្ថែមថា៖«សម្រាប់គោលបំណងនៃការពង្រីកបន្ថែមទៀតនូវរចនាសម្ព័ន្ធ និងកំណើននៃទំហំពាណិជ្ជកម្ម និងដើម្បីសម្រួលដល់ការចូលទៅកាន់ទីផ្សារទៅវិញទៅមក យើងនឹងបន្តការងារលើការរៀបចំកិច្ចព្រមព្រៀងតំបន់ពាណិជ្ជកម្មសេរី រវាងសហភាពសេដ្ឋកិច្ចអឺរ៉ុបអាស៊ី និងឥណ្ឌា»។