ក្រុមសមាជិកព្រឹទ្ធសភាអាមេរិកចំនួន ១៧រូប បានផ្ញើលិខិតមួយច្បាប់ទៅកាន់រដ្ឋមន្ត្រីការបរទេស លោក Marco Rubio កាលពីថ្ងៃពុធ (ទី២០ ខែសីហា) ដោយអំពាវនាវឲ្យសហរដ្ឋអាមេរិកដាក់សម្ពាធលើអ៊ីស្រាអែល ដើម្បីឲ្យប្រទេសនេះអនុញ្ញាតឲ្យអ្នកសារព័ត៌មានមានសិទ្ធិចូលទៅតំបន់ហ្កាហ្សា និងផ្ដល់ការការពារដល់អ្នកទាំងនោះ។

ការផ្ញើរលិខិតនេះកើតឡើងតែមួយសប្តាហ៍បន្ទាប់ពីការវាយប្រហាររបស់អ៊ីស្រាអែល បានសម្លាប់អ្នកសារព័តមានប៉ាឡេស្ទីនមួយក្រុម នៅក្នុងដែនដីដែលត្រូវបានឡោមព័ទ្ធមួយនេះ។

សមាជិកព្រឹទ្ធសភារបស់គណបក្សប្រជាធិបតេយ្យ បានលើកឡើងនៅក្នុងសេចក្តីថ្លែងការណ៍មួយថា៖ សហរដ្ឋអាមេរិកត្រូវតែបញ្ជាក់ឲ្យបានច្បាស់ដល់អ៊ីស្រាអែលថា ការហាមឃាត់ និងត្រួតពិនិត្យស្ថាប័នប្រព័ន្ធផ្សព្វផ្សាយ និងការកំណត់គោលដៅ ឬការគំរាមកំហែងដល់សមាជិកសារព័ត៌មាន គឺមិនអាចទទួលយកបានឡើយ ហើយត្រូវតែបញ្ឈប់»។

លិខិតផ្ញើជូនលោក Rubio ដែលជាអ្នកគាំទ្រអ៊ីស្រាអែលដ៏រឹងមាំម្នាក់នោះ បានរៀបរាប់ថា៖ «យើងជំរុញឲ្យអ្នក (លោក Rubio) ដាក់សម្ពាធលើរដ្ឋាភិបាលអ៊ីស្រាអែលឲ្យការពារអ្នកសារព័ត៌មាន នៅតំបន់ហ្កាហ្សា និងអនុញ្ញាតឲ្យប្រព័ន្ធផ្សព្វផ្សាយអន្តរជាតិចូលទៅកាន់ដែនដីនេះ»។

គួរបញ្ជាក់ថា កាលពីសប្តាហ៍មុន ការវាយប្រហាររបស់អ៊ីស្រាអែល បានសម្លាប់អ្នកសារព័ត៌មាន ៤នាក់ដែលបម្រើការឲ្យប្រព័ន្ធផ្សព្វផ្សាយ Al Jazeera ក្នុងនោះមានរួមទាំងអ្នកឆ្លើយឆ្លងព័ត៌មានទូរទស្សន៍កាតា Anas al-Sharif ក៏ដូចជាអ្នកកាសែតឯករាជ្យ ២នាក់ផងដែរ។ ការវាយប្រហារនោះបានជំរុញឲ្យមានការតវ៉ាជាអន្តរជាតិ៕