ទោះបីជាថ្ងៃទី២៣ ខែសីហា គឺជាថ្ងៃ «Cheoseo» ជាការសម្គាល់តាមរដូវកាលរបស់ប្រទេសកូរ៉េខាងត្បូងដែលជាធម្មតាបង្ហាញពីចុងបញ្ចប់នៃរដូវក្តៅក៏ដោយ ក៏សីតុណ្ហភាពក្តៅខ្លាំងដែលកើតមានឡើងអមជាមួយនឹងការជូនដំណឹងពីរលកកម្ដៅ និងយប់មានអាកាសធាតុត្រូពិក ត្រូវបានគេរំពឹងថា នឹងបន្តទៅដល់សប្តាហ៍ក្រោយ។

យោងតាមរដ្ឋបាលឧតុនិយមកូរ៉េ (KMA) ការផ្ដល់ដំណឹងពីរលកកម្ដៅ បានចូលជាធរមាននៅក្នុងផ្នែកភាគច្រើននៃប្រទេស ដោយមិនរាប់បញ្ចូលតំបន់ភ្នំ គិតត្រឹមម៉ោង ១១ព្រឹក តាមពេលវេលានៅប្រទេសកូរ៉េខាងត្បូង នាថ្ងៃព្រហស្បតិ៍ (ទី២១ ខែសីហា) ខណៈដែលសីតុណ្ហភាពជាក់ស្តែងទូទាំងប្រទេស បានឡើងដល់ ៣៥អង្សាសេ។

ការជូនដំណឹងពីរលកកម្ដៅ និងការព្រមាននានា នៅក្នុងប្រទេសកូរ៉េខាងត្បូង ត្រូវបានចេញនៅពេលដែលសីតុណ្ហភាពជាក់ស្តែងខ្ពស់បំផុត ត្រូវបានគេរំពឹងថា នឹងនៅតែខ្ពស់ជាង ៣៣អង្សាសេ និង ៣៥អង្សាសេ រៀងគ្នា រយៈពេល ២ថ្ងៃ ឬក៏យូរជាងនេះ។

KMA បានបន្ថែមថា កម្ដៅនាពេលថ្មីៗនេះ កើតចេញពីប្រព័ន្ធសម្ពាធខ្ពស់ទីបេ ដែលលាតសន្ធឹងពីលើឧបទ្វីបកូរ៉េ ខណៈដែលខ្យល់ក្តៅ និងសើម នៅតែបន្តបក់ចូលប្រទេស តាមប្រព័ន្ធសម្ពាធខ្ពស់ប៉ាស៊ីហ្វិកខាងជើង។

តាមរយៈសន្និសីទសារព័ត៌មាននៅថ្ងៃទី២១ ខែសីហានេះ KMA បានបញ្ជាក់បន្ថែមថា កម្ដៅនឹងកាន់តែក្ដៅខ្លាំងឡើងៗ នៅចុងសប្ដាហ៍នេះ។ ប្រព័ន្ធសម្ពាធខ្ពស់ទាំង២ នឹងបន្តត្រួតលើគ្នាពីលើឧបទ្វីប ដោយជំរុញឲ្យសីតុណ្ហភាពឡើងកខ្ពស់បន្ថែមពី ១អង្សាសេ ទៅ ២អង្សាសេ៕