រដ្ឋាភិបាល នៅថ្ងៃព្រហស្បតិ៍ (ទី២១ ខែសីហា) នេះ បានប្រាប់ឲ្យដឹងថា ប្រទេសស៊ុយអែតនឹងផ្ដល់ទីតាំងដល់ទីស្នាក់ការកណ្តាលផ្នែកភស្តុភាររបស់អង្គការណាតូ (NATO) នៅក្នុងទីក្រុង Enkoping ភាគពាយព្យនៃរដ្ឋធានី Stockholm សម្រាប់ការចល័តទ័ព នៅអឺរ៉ុបខាងជើង។

រដ្ឋមន្ត្រីការពារជាតិ លោក Pal Jonson បាននិយាយថា៖ «វត្តមានរបស់អង្គការណាតូ នៅក្នុងប្រទេសស៊ុយអែត ជួយពង្រឹងសន្តិសុខ និងសមត្ថភាពរារាំងរបស់យើង។ មជ្ឈមណ្ឌលភស្តុភារ ជួយការពារព្រំដែនភាគខាងជើងរបស់អង្គការណាតូ»។

ហើយបើយោងតាមរដ្ឋាភិបាល បានឲ្យដឹងថា មូលដ្ឋាននេះនឹងមានបុគ្គលិកប្រហែល ៧០នាក់ នៅក្នុងពេលមានសន្តិភាព។ សេចក្តីថ្លែងការណ៍របស់រដ្ឋាភិបាលបានឲ្យដឹងថា «នៅក្នុងស្ថានភាពប្រុងប្រយ័ត្នខ្ពស់ ហើយទីបំផុតមានសង្រ្គាម ទីស្នាក់ការកណ្តាលនេះ នឹងអាចបន្ថែមបុគ្គលិកដល់ ១៦០នាក់»។ កងកម្លាំងប្រដាប់អាវុធមានភារកិច្ចរៀបចំ និងបង្កើតមូលដ្ឋាន ដើម្បីឲ្យអាចប្រតិបត្តិការបាននៅចុងឆ្នាំ២០២៧»។

លោក Jonson បានប្រាប់ទូរទស្សន៍សាធារណៈ SVT ថា ការងារនៅមជ្ឈមណ្ឌលនេះ នឹង «ពាក់ព័ន្ធជាមួយការដឹកជញ្ជូនការផ្គត់ផ្គង់ផ្សេងៗ ដូចជាប្រេងឥន្ធនៈ គ្រាប់រំសេវ និងគ្រឿងបន្លាស់»។ លោក Jonson បានបន្ថែមថា៖ «គោលបំណង គឺដើម្បីអាចដឹកជញ្ជូនគ្រឿងយុទ្ធោបករណ៍ និងបុគ្គលិកច្រើនឆ្លងកាត់ដែនដីស៊ុយអែត»។

គួរបញ្ជាក់ថា ប្រទេសអឺរ៉ុបខាងជើងមួយនេះ បានទម្លាក់លក្ខន្តិកមិនចូលបក្សសម្ព័ន្ធយោធារយៈពេល ២សតវត្សរ៍ ហើយបានដាក់ពាក្យចូលជាសមាជិករបស់អង្គការណាតូ បន្ទាប់ពីមានការលុកលុយរបស់រុស្ស៊ីលើអ៊ុយក្រែន ដោយបានក្លាយជាសមាជិកទី៣២ របស់សម្ព័ន្ធភាពយោធាមួយនេះ ក្នុងខែមីនា ឆ្នាំ២០២៤៕