ប្រធានាធិបតីអាមេរិក លោក Donald Trump កាលពីថ្ងៃព្រហស្បតិ៍ (២១ សីហា) បានកំណត់ពេល ២សប្តាហ៍ សម្រាប់ការវាយតម្លៃលើកិច្ចចរចាសន្តិភាពរវាងភាគីជម្លោះរុស្ស៊ី និងអ៊ុយក្រែន ខណៈលោកខិតខំបង្កើនកិច្ចប្រឹងប្រែងចរចាបញ្ចប់សង្គ្រាមដ៏បង្ហូរឈាមជាង ៣ឆ្នាំកន្លះមកនេះឱ្យបានឆាប់រហ័ស។

ថ្លែងក្នុងបទសម្ភាសន៍តាមទូរសព្ទរបស់ប្រព័ន្ធផ្សព្វផ្សាយ Newsmax នៅពេលត្រូវសាកសួរពីឱកាសនៃកិច្ចព្រមព្រៀងសន្តិភាព លោក Trump បានប្រាប់ពីគំនិតរបស់លោកថា "អាចក្នុងរយៈពេលពីរសប្តាហ៍ គ្រប់គ្នានឹងដឹងហើយពីលទ្ធផល"។ លោក Trump មិនបានផ្តល់ព័ត៌មានលម្អិតបន្ថែមទេ គ្រាន់តែថា "បន្ទាប់ពីនោះ លោកនឹងត្រូវប្រើវិធីផ្សេងទៀត"។

លោក Trump បានសន្យាក្នុងអំឡុងពេលបោះឆ្នោតប្រធានាធិបតីឆ្នាំ២០២៤ ថានឹងបញ្ចប់សង្រ្គាមនេះក្នុងពេល ១ថ្ងៃប៉ុណ្ណោះ តែរហូតមកដល់ពេលនេះ មិនទាន់មានផ្លែផ្កាសំខាន់ៗសម្រេចបាននៅឡើយ ជាង ៣ឆ្នាំចាប់តាំងពីប្រតិបត្តិការយោធារបស់រុស្ស៊ី លើអ៊ុយក្រែន ក្នុងខែកុម្ភៈ ឆ្នាំ២០២២។

ប្រធានាធិបតីអ៊ុយក្រែន លោក Volodymyr Zelenskiy កាលពីថ្ងៃទី២១ ខែសីហា បានចោទរុស្ស៊ី ថា "ព្យាយាមជៀសវាងពីភាពចាំបាច់ដើម្បីជួបពិភាក្សា" ហើយថា រុស្ស៊ីមិនចង់បញ្ចប់សង្គ្រាមនោះទេ។ ចំណែករុស្ស៊ីវិញនិយាយថា អ៊ុយក្រែនហាក់មិនចាប់អារម្មណ៍លើសន្តិភាព "រយៈពេលវែង" ទាល់តែសោះ ដោយចោទទីក្រុងគីវ វិញថាចង់បានការធានាសន្តិសុខមិនស្របគ្នានឹងការទាមទាររបស់រុស្ស៊ី៕