បេសកជនពិសេសរបស់អង្គការសហប្រជាជាតិទទួលបន្ទុកស៊ីរីលោក Geir Pedersen កាលពីថ្ងៃព្រហស្បតិ៍ បានព្រមានអំពី«បរិយាកាសនយោបាយកាន់តែអាក្រក់ឡើង ចំពេលមានស្ថានភាពសន្តិសុខមិនច្បាស់លាស់ នៅក្នុងប្រទេសស៊ីរី។

លោកបានប្រាប់ក្រុមប្រឹក្សាសន្តិសុខអង្គការសហប្រជាជាតិនៅក្នុងសន្និសីទប្រចាំខែមួយថា បទឈប់បាញ់កាលពីថ្ងៃទី ១៩ ខែកក្កដា នៅខេត្ត Sweida របស់ប្រទេសស៊ីរី បានប្រឈមនឹងភាពតានតឹង ប៉ុន្តែរហូតមកដល់ពេលនេះ បានទប់ស្កាត់មិនឲ្យធ្លាក់ចូលទៅក្នុងជម្លោះបើកចំហ។ ទោះបីជាយ៉ាងណាក៏ដោយ អរិភាព និងការប៉ះទង្គិចគ្នាដ៏គ្រោះថ្នាក់ នៅផ្នែកខ្លះនៃខេត្ត Sweida នៅតែមាន ហើយអំពើហិង្សា អាចកើតឡើងវិញ នៅពេលណាមួយ។

លោកបាននិយាយថា៖«ចំណែកខ្ញុំមានការព្រួយបារម្ភថា រយៈពេលមួយខែនៃភាពស្ងប់ស្ងាត់ខាងយោធា ដែលទាក់ទងគ្នានេះ នឹងធ្វើឲ្យបរិយាកាសនយោបាយកាន់តែធ្ងន់ធ្ងរ ដោយវោហាសាស្ត្រដែលកាន់ខ្លាំងឡើងនោះ បានធ្វើឲ្យស្ថានភាពនេះ កាន់តែស្មុកស្មាញ។ ផ្នែកមួយនេះ ត្រូវបានជំរុញដោយការលេចចេញនូវវីដេអូដ៏គួរឲ្យសោកសៅបន្ថែមទៀតនៃការរំលោភបំពានយ៉ាងច្បាស់ ដែលបានកើតឡើង នៅក្នុងខេត្ត Sweida អំឡុងពេលមានការកើនឡើងភាពតានតឹង»។

លោក Pedersen បានសង្កត់ធ្ងន់លើសារៈសំខាន់នៃការទទួលខុសត្រូវចំពោះការពាក់ព័ន្ធរបស់ជនល្មើស។

លោកបាននិយាយថា អាជ្ញាធរបណ្តោះអាសន្នស៊ីរី បានប្រកាសពីការបង្កើតគណៈកម្មាធិការស្វែងរកការពិត ដែលមានភារកិច្ចស៊ើបអង្កេតការរំលោភបំពាន ដែលបានប្រព្រឹត្តនៅក្នុងខេត្ត Sweida ។ លោកបាននិយាយថា វាពិតជាចាំបាច់ណាស់ដែលការរកឃើញរបស់គណៈកម្មាធិការនេះ ត្រូវបានផ្សព្វផ្សាយជាសាធារណៈយ៉ាងពេញលេញ ហើយថា ជនល្មើសទាំងអស់ ត្រូវចាប់ឲ្យទទួលខុសត្រូវចំពោះការពាក់ព័ន្ធរបស់ពួកគេ។