អ្នកនាំពាក្យរបស់លោក Lee Jae Myung នៅថ្ងៃសុក្រ (ទី២២ ខែសីហា) នេះ បានឲ្យដឹងថា លោកប្រធានាធិបតីកូរ៉េខាងត្បូង នឹងបញ្ជូនគណៈប្រតិភូពិសេសមួយទៅកាន់ប្រទេសចិន ចាប់ពីថ្ងៃទី២៤ ដល់ថ្ងៃទី២៧ ខែសីហា ខណៈដែលទីក្រុងសេអ៊ូល និងប៉េកាំង កាន់តែសម្របចូលគ្នា ដើម្បីឆ្លើយតបទៅនឹងគោលនយោបាយពន្ធរបស់ប្រធានាធិបតីអាមេរិក លោក Donald Trump។

អ្នកនាំពាក្យលោកស្រី Kang Yu-jung បាននិយាយថា គណៈប្រតិភូនឹងនាំសាររបស់លោក Lee ទៅកាន់ទីនោះ ដែលបានសង្កត់ធ្ងន់លើការបន្តការអភិវឌ្ឍនៃភាពជាដៃគូយុទ្ធសាស្ត្ររបស់ប្រទេសទាំង២។

ចិនគឺជាដៃគូពាណិជ្ជកម្មដ៏ធំបំផុតរបស់កូរ៉េខាងត្បូង ហើយទំនាក់ទំនងការទូត រវាងប្រទេសទាំង២ មានភាពល្អប្រសើរឡើង គិតចាប់តាំងពីមានជម្លោះឆ្នាំ២០១៧ ជុំវិញការដាក់ពង្រាយប្រព័ន្ធការពារមីស៊ីលរបស់សហរដ្ឋអាមេរិក ដែលទីក្រុងប៉េកាំងបានជំទាស់។

លោក Lee ដែលបានទទួលជ័យជម្នះក្នុងសំឡេងដាច់ខាត នៅក្នុងការបោះឆ្នោតមុនអាណត្តិ កាលពីខែមិថុនា បានអនុវត្តនូវយុទ្ធសាស្ត្រផ្សះផ្សាបន្ថែមទៀត ចំពោះប្រទេសចិន ដែលជាមហាអំណាចសេដ្ឋកិច្ចទី២ របស់ពិភពលោក ដោយបង្ហាញពីតួនាទីរបស់ខ្លួនជាដៃគូពាណិជ្ជកម្មដ៏សំខាន់។ លោកបានបង្ហាញការស្ទាក់ស្ទើរ ក្នុងការប្រកាន់ជំហរម៉ឺងម៉ាត់ ចំពោះភាពតានតឹងផ្នែកសន្តិសុខ នៅច្រកសមុទ្រតៃវ៉ាន់។

បើយោងតាមការិយាល័យប្រធានាធិបតីកូរ៉េខាងត្បូង បានឲ្យដឹងថា គណៈប្រតិភូគ្រោងនឹងជួបជាមួយរដ្ឋមន្ត្រីការបរទេសចិន លោក Wang Yi។

បើទោះបីទីក្រុងសេអ៊ូលបានដោះស្រាយទម្លាក់អត្រាពន្ធរបស់លោក Trump លើទំនិញកូរ៉េខាងត្បូង ពី ២៥ភាករយ មកត្រឹម ១៥ភាគរយ នៅក្នុងកិច្ចព្រមព្រៀងពាណិជ្ជកម្មខែកក្កដាក៏ដោយ ក៏រដ្ឋបាលថ្មីត្រូវបានជំរុញឲ្យចាត់វិធានការ ដើម្បីគាំទ្រដល់ក្រុមហ៊ុននានា ក្នុងគោលបំណងដោះស្រាយការទប់ស្កាត់ពាណិជ្ជកម្ម និងរុករកទីផ្សារថ្មី៕