នាយករដ្ឋមន្ត្រីហុងគ្រី លោក Viktor Orban នៅថ្ងៃសុក្រ (ទី២២ ខែសីហា) នេះ បានឲ្យដឹងថា លោកបានប្តឹងទៅប្រធានាធិបតីអាមេរិក លោក Donald Trump បន្ទាប់ពីសកម្មភាពយោធារបស់អ៊ុយក្រែនប្រឆាំងនឹងការលុកលុយឈ្លានពានរបស់រុស្ស៊ី បានរំខានការផ្គត់ផ្គង់ប្រេង។

ប្រទេសហុងគ្រីបានជួបប្រទះម្តងហើយម្តងទៀតនូវការកាត់ផ្ដាច់នៃការផ្គត់ផ្គង់ប្រេងរបស់ខ្លួន តាមរយៈបំពង់បង្ហូរប្រេង Druzhba ដោយមានការរំខានជាលើកទី៣ ក្នុងរយៈពេលប៉ុន្មានថ្ងៃថ្មីៗនេះ ដែលត្រូវបានរាយការណ៍នៅថ្ងៃសុក្រនេះ។

យោងតាមលោក Aleksandr Bogomaz អភិបាលតំបន់ Bryansk ភាគខាងលិច បានឲ្យដឹងថា ការវាយប្រហាររបស់អ៊ុយក្រែន បានត្រូវចំ «ហេដ្ឋារចនាសម្ព័ន្ធឥន្ធនៈ» នៅក្នុងតំបន់ Unechsky នៃប្រទេសរុស្ស៊ី។

តែយ៉ាងណាក្ដី លោកមិនបានដាក់ឈ្មោះបំពង់បង្ហូរប្រេងនេះចំៗនោះទេ ប៉ុន្តែស្ថានីយ៍បូមប្រេងដ៏សំខាន់ Druzhba ដែលភាសារុស្ស៊ីមានន័យថា «មិត្តភាព» ស្ថិតនៅតំបន់នេះ ហើយត្រូវបានកំណត់គោលដៅវាយប្រហារជាច្រើនដង។

បើយោងតាមការបង្ហោះនៅលើបណ្ដាញសង្គម Facebook ដោយគណបក្ស Fidesz របស់លោក នាថ្ងៃសុក្រនេះ លោក Orban បានប្រាប់ថា៖ «ខ្ញុំបានសុំជំនួយពីប្រធានាធិបតីអាមេរិក។ អ៊ុយក្រែននៅតែបន្តបាញ់ផ្លោងលើបំពង់បង្ហូរប្រេង Friendship»។ លោកបានបញ្ជាក់ថា លោក Trump បានឆ្លើយតបដោយបង្ហាញពីការគាំទ្រ។

ចំណែករដ្ឋមន្ត្រីការបរទេសហុងគ្រី លោក Peter Szijjarto បាននិយាយថា ប្រទេសហុងគ្រី និងស្លូវ៉ាគី ក៏បានផ្ញើលិខិតមួយទៅកាន់ទីក្រុងប្រ៊ុចសែល (បែលហ្ស៊ិក) ផងដែរ ដោយស្នើឲ្យគណៈកម្មការអឺរ៉ុប «ចាត់វិធានការប្រឆាំងនឹងការវាយប្រហារដដែលៗរបស់អ៊ុយក្រែន លើបំពង់បង្ហូរប្រេង Druzhba»៕