ប្រធានាធិបតីអាមេរិក លោក Donald Trump នៅថ្ងៃសុក្រ (២២ សីហា) បានចេញការគំរាមជាថ្មីម្ដងទៀតក្នុងការដាក់ទណ្ឌកម្មលើរុស្ស៊ី ប្រសិនបើពុំមានវឌ្ឍនភាពឆ្ពោះទៅរកដំណោះស្រាយសន្តិភាពនៅអ៊ុយក្រែន ក្នុងរយៈពេលពីរសប្តាហ៍ទេនោះ ដែលជំហាននេះបានបង្ហាញពីការខកចិត្តកាន់តែខ្លាំងឡើងលើទីក្រុងមូស្គូ រយៈមួយសប្តាហ៍ប៉ុណ្ណោះបន្ទាប់ពីជំនួបរបស់លោក ជាមួយប្រធានាធិបតីរុស្ស៊ី Vladimir Putin នៅរដ្ឋអាឡាស្កា។

ថ្លែងប្រាប់អ្នកសារព័ត៌មាននៅសេតវិមាន លោក Trump បាននិយាយថា "ខ្ញុំនឹងធ្វើការសម្រេចចិត្តពីអ្វីដែលអាមេរិកត្រូវធ្វើ ហើយនឹងក្លាយជាការសម្រេចចិត្តដ៏សំខាន់បំផុត ហើយនោះអាចជាការដាក់ទណ្ឌកម្មដ៏ធំ ឬពន្ធដ៏ធំ ឬទាំងពីរយ៉ាងនេះ ឬក៏អាចមិនធ្វើអ្វីទាំងអស់ដែរ"។

លោកសង្កត់ធ្ងន់ថា លោកមិនសប្បាយចិត្តនោះទេចំពោះការវាយប្រហាររបស់រុស្ស៊ី ដែលត្រូវលើរោងចក្ររបស់អាមេរិក នៅអ៊ុយក្រែន ក្នុងសប្តាហ៍នេះ ដែលបណ្តាលឱ្យមានអគ្គិភ័យដ៏ធំ ធ្វើឱ្យបុគ្គលិកមួយចំនួននៃរោងចក្រនេះបានរងរបួស។

ទន្ទឹមនឹងនេះ ប្រធានាធិបតីអ៊ុយក្រែន លោក Volodymyr Zelenskiy បាននិយាយកាលពីថ្ងៃសុក្រដដែលនោះថា រុស្ស៊ីកំពុងតែធ្វើអ្វីៗគ្រប់បែបយ៉ាងដែលអាចធ្វើទៅបាន ដើម្បីរារាំងកិច្ចប្រជុំរវាងលោក និងលោក Putin ដើម្បីចរចារកសន្តិភាព ខណៈរដ្ឋមន្ត្រីការបរទេសរុស្ស៊ី បាននិយាយថា របៀបវារៈសម្រាប់កិច្ចប្រជុំបែបនេះមិនទាន់រួចរាល់នោះទេ៕