បន្ទាប់ពីក្រុមឃ្លាំមើលភាពអត់ឃ្លានសកល របស់អង្គការសហប្រជាជាតិ កាលពីថ្ងៃសុក្រ (២២ សីហា) បានប្រកាសជាលើកដំបូងថាគ្រោះទុរ្ភិក្សបានវាយប្រហារភាគខាងជើងតំបន់ហ្កាហ្សាហើយនោះ អ៊ីស្រាអែលចេញមុខបដិសេធយ៉ាងដាច់អហង្ការលើរបាយការណ៍នេះថាជា "ការកុហកបោកប្រាស់" និង "ចោទប្រកាន់លាបពណ៌" ហើយសហរដ្ឋអាមេរិកវិញក៏ហាក់ដូចជាច្រានចោលសេចក្ដីប្រកាសនេះ ថាជាផ្នែកមួយនៃ "ការនិទានរឿងមិនពិតនៃភាពអត់ឃ្លានដោយចេតនា" ពីក្រុមហាម៉ាស។

នៅព្រឹកថ្ងៃសុក្រនោះ ប្រព័ន្ធបែងចែកដំណាក់កាលសន្តិសុខស្បៀង (IPC) របស់អង្គការសហប្រជាជាតិ បានប្រកាសជាផ្លូវការថាមានគ្រោះទុរ្ភិក្សក្នុងផ្នែកខ្លះនៃតំបន់ហ្កាហ្សាស្ទ្រីប ដោយនិយាយថា មនុស្សប្រមាណ ៥១៤.០០០នាក់ — ឬជិតមួយភាគបួននៃចំនួនប្រជាជនហ្កាហ្សាសរុប — កំពុងជួបប្រទះគ្រោះទុរ្ភិក្ស ហើយចំនួននោះត្រូវរំពឹងថានឹងកើនឡើងដល់ ៦៤១.០០០នាក់ នៅចុងខែកញ្ញា ខាងមុខ។

អ៊ីស្រាអែល បានបដិសេធយ៉ាងឆាប់រហ័សនូវរបាយការណ៍នេះ ដោយនិយាយថា IPC ពឹងផ្អែកតែលើប្រភពរបស់ក្រុមហាម៉ាស និងចោទប្រព័ន្ធនេះថាបាន "បំភ្លៃច្បាប់របស់ខ្លួន" ក្នុងការប្រកាសទុរ្ភិក្ស។ ក្នុងសេចក្តីថ្លែងការណ៍មួយកាលពីថ្ងៃសុក្រ ការិយាល័យនាយករដ្ឋមន្ត្រីអ៊ីស្រាអែល បានហៅការប្រកាសទុរ្ភិក្សរបស់ IPC នេះថាជា "ការកុហកទាំងស្រុង" និង "ការចោទប្រកាន់មិនពិត" លាបពណ៌លើលើជនជាតិជ្វីហ្វ។

ដោយដកស្រង់ទិន្នន័យពីអ្នកសម្របសម្រួលក្រសួងការពារជាតិនៃសកម្មភាពរដ្ឋាភិបាលក្នុងដែនដីនេះ ការិយាល័យនាយករដ្ឋមន្ត្រីអ៊ីស្រាអែល បានសង្កត់ធ្ងន់ថា អ៊ីស្រាអែលបានជួយសម្រួលដល់ការបញ្ចូលជំនួយរាប់លានតោនទៅកាន់តំបន់ហ្កាហ្សា ចាប់តាំងពីសង្គ្រាមនៅទីនោះត្រូវបានបង្កឡើងដោយការវាយលុករបស់ក្រុមហាម៉ាស នៅថ្ងៃទី៧ ខែតុលា ឆ្នាំ២០២៣ មក៕