ក្រុមមន្រ្តីសុវត្ថិភាពដឹកជញ្ជូននិយាយថា ពួកគេកំពុងពិនិត្យមើលថាតើខ្សែក្រវាត់នៅមានតួនាទីអ្វីខ្លះក្នុងរថយន្តក្រុង និងស្ថានភាពផ្លូវដែលអាចរួមចំណែកនៅក្នុងគ្រោះថ្នាក់រថយន្តក្រុងនៅរដ្ឋញូវយ៉ក សហរដ្ឋអាមេរិក ដែលបានសម្លាប់មនុស្សយ៉ាងហោច ៥នាក់ និងមនុស្សរាប់សិបនាក់ផ្សេងទៀត រងរបួស ។

រថយន្តក្រុងដឹកអ្នកដំណើរជាង ៥០នាក់ លែងអាចគ្រប់គ្រងម្ចាស់ការលើខ្លួនឯងបាន និងក្រឡាប់នៅលើផ្លូវហាយវ៉េ Upstate New York កាលពីថ្ងៃសុក្រ ។

លោក Tom Chapman គឺជាសមាជិកក្រុមប្រឹក្សាសុវត្ថិភាពដឹកជញ្ជូនជាតិ(NTSB)និយាយថា ឧបទ្ទេវហេតុគ្រោះថ្នាក់នេះ បានកើតឡើងនៅទីក្រុង Pembroke រដ្ឋញូវយ៉ក ស្ថិតនៅចម្ងាយប្រហែល ៤៨គ.ម ភាគខាងកើតទីក្រុង Buffalo ពេលដែលរថយន្តក្រុងធ្វើដំណើរតាមផ្លូវចេញពីទឹកជ្រោះ Niagara Falls ឆ្ពោះទៅកាន់ទីក្រុងញូវយ៉ក ។

ក្រុមប្រឹក្សា NTSB បានបញ្ជូនក្រុមការងាររបស់ខ្លួន ដើម្បីទៅស៊ើបអង្កេតឧបទ្ទេវហេតុមួយនេះ ហើយត្រូវបានគេរំពឹងថានឹងចំណាយពេលច្រើនថ្ងៃនៅកន្លែងកើតហេតុ ។

លោក Chapman បន្តថា អ្នកដំណើរជាច្រើននាក់បានជាប់នៅក្នុងបំណែករថយន្តក្រុង ហើយនិងត្រូវបាននាំយកចេញ ខណៈអ្នកដំណើរផ្សេងទៀត ខ្ទាតចេញពីក្នុងរថយន្តក្រុង ពេលដែលវាក្រឡាប់នៅលើផ្លូវហាយវ៉េ ។

លោកបញ្ជាក់ថា អ្នកបើកបរដែលរស់រានពីឧបទ្ទេវហេតុគ្រោះថ្នាក់នេះ បាត់បង់ម្ចាស់ការលើខ្លួនឯង ពេលដែលរថយន្តកំពុងបើកបរក្នុងល្បឿនលឿន បណ្តាលឲ្យរថយន្តក្រុងក្រឡាប់ផ្ងារពោះបែបនេះ ។ គ្មានរថយន្តផ្សេងទៀត ពាក់ព័ន្ធនឹងគ្រោះថ្នាក់នេះឡើយ ។

ក្រុមអ្នកស៊ើបអង្កេតនិយាយថា ពួកគេនឹងពិនិត្យមើលកាមេរ៉ាសុវត្ថិភាពនៅលើរថយន្តក្រុងដែលរកឃើញនៅកន្លែងកើតហេតុ ហើយពួកគេសង្ឃឹមថា នឹងធ្វើបទសម្ភាសន៍ជាមួយអ្នកបើកបររថយន្តក្រុងផងដែរ ៕