ការបិទផ្លូវដ៏តឹងរ៉ឹងរបស់អ៊ីស្រាអែល នៅលើតំបន់ហ្កាហ្សា កំពុងធ្វើឲ្យតំបន់នេះធ្លាក់ចូលទៅក្នុងមហន្តរាយមនុស្សធម៌ ដោយគ្រោះទុរ្ភិក្សបានរីករាលដាលយ៉ាងឆាប់រហ័ស និងធ្វើឲ្យអ្នកស្រុករាប់សែននាក់ ស្ថិតក្នុងស្ថានភាពអត់ឃ្លាន។

អ្នកស្រុកដូចជាលោក Abdul Karim Saidam ដែលជាឪពុកមានកូន ៦នាក់មកពីជំរំជនភៀសខ្លួន Nuseirat ប្រឈមមុខនឹងការរង់ចាំដ៏ក្រៀមក្រំជាច្រើនម៉ោង ដើម្បីទទួលជំនួយអាហារដ៏តិចតួចបំផុត។

លោកបាននិយាយថា៖«ខ្ញុំចង់បានអាហារសម្រាប់ចិញ្ចឹមកូន។ ការចិញ្ចឹមជីវិត គឺពិតជាពិបាកណាស់ ដូចអ្នកឃើញស្រាប់ហើយថា ផ្លូវឆ្លងកាត់ទំាងអស់ ត្រូវបានបិទទាំងស្រុង គ្មានអ្វីដែលយើងអាចធ្វើបានទេ។ ស្ថានភាព គឺពិបាក ស្ថានភាពសេដ្ឋកិច្ច ដែលយើងកំពុងជួបប្រទះ គឺកាន់តែលំបាក ខ្ញុំមកទីនេះ ដើម្បីបានអាហារចិញ្ចឹមកូនរបស់ខ្ញុំ។ ខ្ញុំមកតាំងពីព្រលឹម ដើម្បីឈរតម្រង់ជួររហូតដល់ថ្ងៃត្រង់។ អញ្ចឹងហើយទើបខ្ញុំអាចទទួលអាហារឲ្យកូន ហើយខ្ញុំយកអាហារនេះត្រឡប់ទៅផ្ទះ ដើម្បីឲ្យពួកគេហូប។ យើងបានរង់ចំា ហូតដល់ម៉ោង ១២ ទើបបានអាហារ។ យើងមកតាំងពីម៉ោង ៨ព្រឹក ដល់ម៉ោង ១២ថ្ងៃត្រង»។

លោកបានបន្ថែមថា៖«ខ្ញុំបួងសួងថា សូមព្រះអាឡស់ជួយសង្រ្គោះពួកយើងផង សូមឲ្យអ្វីៗគ្រប់យ៉ាងបានល្អប្រសើរឡើង ហើយការឡោមព័ទ្ធនេះ ត្រូវបានបញ្ចប់ឲ្យបានឆាប់»។

ចាប់តាំងពីថ្ងៃទី ០២ ខែមីនា នៅពេលដែលដំណាក់កាលដំបូងនៃកិច្ចព្រមព្រៀងបទឈប់បាញ់ រវាងអ៊ីស្រាអែល និងក្រុមហាម៉ាស បានបញ្ចប់ អ៊ីស្រាអែលក៏បានរឹតបន្តឹងការបិទផ្លូវរបស់ខ្លួន លើតំបន់ហ្កាហ្សា ដោយកាត់បន្ថយយ៉ាងធ្ងន់ធ្ងរនូវការចូលស្បៀងអាហារ ប្រេងឥន្ធនៈ និងជំនួយមនុស្សធម៌។