ភ្នំពេញ៖ ឯកឧត្តមសាស្រ្តាចារ្យ ស៊ា ហួង រដ្ឋលេខាធិការក្រសួងសុខាភិបាល ព្រឹកថ្ងៃទី២០ ខែមករា ឆ្នាំ២០២២នេះ បានអញ្ជើញសម្ពោធដាក់ឲ្យដំណើរការផ្នែកឆ្លុះសរសៃឈាមបេះដូង និងផ្នែក សង្រ្គោះបន្ទាន់ជំងឺបេះដូង នៅអគារព្រះសីហនុរាជ មនី្ទរពេទ្យមិត្តភាពខ្មែរ-សូវៀត។

ឯកឧត្តមសាស្រ្តាចារ្យ ងី ម៉េង ប្រធានមនី្ទរពេទ្យមិត្តភាពខ្មែរ-សូវៀត បានឲ្យដឹងថា មនី្ទរពេទ្យ​មិត្តភាពខ្មែរ-សូវៀត ​ជាមនី្ទរពេទ្យទូទៅ ​មានគ្រែអ្នកជំងឺ១០០០គ្រែ ​និង២៥ផ្នែក ដូចជា៖ ផ្នែកវះកាត់, ផ្នែកតម្រង់នោម, ផ្នែកលាងឈាម, ផ្នែកមហារីក, ផ្នែកផ្លូវចិត្ត, ផ្នែកជំងឺភ្នែក, ផ្នែកជំងឺសើស្បែក, ផ្នែករោគស្រី្ត, ផ្នែកសម្ពព, ផ្នែកប្រព័ន្ធប្រសាទ (សរសៃប្រសាទវះកាត់ និងសរសៃប្រសាទជំងឺទូទៅ), ផ្នែកមនី្ទរពិសោធន៍, ផ្នែកក្រពះពោះវៀន ​បានបំពាក់ឧបករណ៍វេជ្ជសាស្រ្តមិនចាញ់បរទេសឡើយ។ ហើយថ្ងៃនេះមនី្ទរពេទ្យដាក់ឲ្យប្រើបា្រស់ផ្នែកឆ្លុះសរសៃឈាមបេះដូង និងផ្នែក​សង្រ្គោះបន្ទាន់​ជំងឺ​បេះដូង ដែលជាផ្នែកមួយដ៏សំខាន់សម្រាប់ជួយសង្រ្គោះអាយុជីវិត​ប្រជាជនទាំងអស់ ដែល​មាន​បញ្ហាបេះដូង។

ទន្ទឹមគ្នានោះដែរ ឯកឧត្តម ស៊ា ហួង បានថ្លែងថា ការដាក់ដំណើរការផ្នែកឆ្លុះសរសៃឈាមបេះដូង និងផ្នែកសង្រ្គោះបន្ទាន់ជំងឺបេះដូង ​នៅមនី្ទរពេទ្យមិត្តភាពខ្មែរ-សូវៀត ពិតជាមានមោទនភាព​ខ្ពស់​ណាស់ ព្រោះថា​បច្ចុប្បន្ន​តម្រូវការរបស់ប្រជាពលរដ្ឋត្រូវ​ការ​ព្យាបាល​ជំងឺបេះដូង​មាន​ការកើនឡើង។ ហើយយើងគ្រប់គ្នាក៏តែងតែឃើញថា ​ប្រជាជនមួយចំនួន​ ដែលមានលទ្ធភាពភាគច្រើន បានចេញ​ទៅ​ព្យាបាល​នៅក្រៅប្រទេស​ ដើម្បីដាក់ថ្មបេះដូង ចង្វាក់បេះដូង ​ឃើញថា​មានតែស្រុកគេទេ។ សម្រាប់ប្រទេសកម្ពុជាយើង ​គឺមាននៅមនី្ទរពេទ្យកាល់ម៉ែត ​ប៉ុន្តែមនី្ទរពេទ្យកាល់ម៉ែត មិនអាចធានា​ចំនួន​ប្រជាជន​យើងបាន​ទាំងអស់នោះទេ។

ឯកឧត្តម រដ្ឋលេខាធិការក្រសួងសុខាភិបាល ​ក៏បានណែនាំដល់ប្រជាពលរដ្ឋថា វិស័យសុខាភិបាល​នាពេល​បច្ចុប្បន្ន ​យើងមានសមត្ថភាព លទ្ធភាពគ្រប់គ្រាន់ប្រហាក់ប្រហែល​ នឹងក្រៅប្រទេស ដើម្បី​ផ្តល់​សេវាជូនប្រជាជន ​ជាពិសេសជំងឺបេះដូងតែម្តង ហើយករណីស្លាប់ដោយសារជំងឺបេះ​ដូងនេះ ក៏មានច្រើនផងដែរ។

ដូច្នេះមនី្ទរពេទ្យមិត្តភាពខ្មែរ-សូវៀត បើកព្យាបាល ​និងសង្រ្គោះបន្ទាន់ជំងឺបេះដូង ពេលមានបញ្ហា គឺប្រជាជនយើងអាចមកទទួល​សេវា​នៅក្នុងមនី្ទរពេទ្យមិត្តភាពខ្មែរ-សូវៀត​ ទាន់ពេលវេលា និង​មានប្រសិទ្ធភាពខ្ពស់៕ អត្ថបទ៖ រដ្ឋា