កម្មវិធីស្បៀងអាហារពិភពលោក(WFP)របស់អង្គការសហប្រជាជាតិ កំពុងអំពាវនាវរកជំនួយមនុស្សធម៌សម្រាប់ជនមូស្លីមរ៉ូហ៊ីងយ៉ា ទាំងក្នុងនិងក្រៅសហភាពមីយ៉ាន់ម៉ា។ នៅថ្ងៃច័ន្ទនេះ គឺជាគម្រប់ខួប៨ឆ្នាំ ចាប់តាំងពីក្រុមសកម្មប្រយុទ្ធរ៉ូហ៊ីងយ៉ា បានវាយប្រហារទៅលើអគារនគរបាលនិងយោធា នៅក្នុងរដ្ឋ Rakhine ភាគខាងលិច ដែលជាទីស្នាក់របស់សមាជិកជាច្រើននៃជនជាតិភាគតិច។

មានការប៉ះទង្គិចគ្នាយ៉ាងខ្លាំងរវាងក្រុមសកម្មប្រយុទ្ធនិងយោធាមីយ៉ាន់ម៉ា។ ជនជាតិរ៉ូហ៊ីងយ៉ាជាង ៧០០.០០០នាក់ បានភៀសខ្លួនទៅកាន់ប្រទេសជិតខាងបង់ក្លាដែស ជាកន្លែងដែលពួកគេស្នាក់នៅក្នុងទីជម្រក។ នាយកអង្គការ WFP ប្រចាំសហភាពមីយ៉ាន់ម៉ា លោក Michael Dunford បានប្រាប់ ទូរទស្សន៍NHK ថា «ស្ថានភាពសម្រាប់ជនជាតិរ៉ូហ៊ីងយ៉ា គឺធ្ងន់ធ្ងរខ្លាំង»។ លោកនិយាយថា អង្គការWFP ត្រូវការមូលនិធិ៣០លានដុល្លារដើម្បីជួយប្រជាជននៅក្នុងរដ្ឋ Rakhine ក្នុងរយៈពេលប្រាំមួយខែខាងមុខនេះ។

លោកបាននិយាយបន្ថែមថា «ប្រសិនបើយើង មិនទទួលបានមូលនិធិនោះទេ មនុស្សនឹងស្រេកឃ្លាន ហើយកង្វះអាហារូបត្ថម្ភនឹងកើនឡើង»។ ទាក់ទិននឹងការវិលត្រឡប់របស់ជនភៀសខ្លួនរ៉ូហ៊ីងយ៉ាវិញ លោក Dunford បាននិយាយថា រឿងសំខាន់បំផុតគឺការបញ្ចប់ជម្លោះ ដោយលោកបានសង្កត់ធ្ងន់ពីភាពចាំបាច់ក្នុងការដោះស្រាយការប្រយុទ្ធគ្នាតាមរយៈការខិតខំប្រឹងប្រែងផ្នែកការទូត និងជំរុញប្រទេសជិតខាងឱ្យបោះជំហានទៅមុខ ដើម្បីសម្រួលដល់ដំណើរការសន្តិភាព។