ក្រុមហាម៉ាស បាននិយាយកាលពីថ្ងៃអាទិត្យថា ខ្លួនបានយល់ព្រមលើកិច្ចព្រមព្រៀងដោះដូរអ្នកទោសមួយផ្នែក ជាមួយអ៊ីស្រាអែល ហើយបានត្រៀមខ្លួនជាស្រេចសម្រាប់កិច្ចព្រមព្រៀងបទឈប់បាញ់គ្រប់ជ្រុងជ្រោយមួយ ប៉ុន្តែនាយករដ្ឋមន្ត្រីអ៊ីស្រាអែលលោក បេនចាមីន ណេតាន់យ៉ាហ៊ូ (Benjamin Netanyahu) បានច្រានចោលដំណោះស្រាយទាំងអស់។

នៅក្នុងសេចក្តីថ្លែងការណ៍មួយ ក្រុមហាម៉ាស បាននិយាយថា ការអនុម័តរបស់លោក ណេតាន់យ៉ាហ៊ូ លើ «ផែនការកាន់កាប់តំបន់ហ្កាហ្សា» បន្ទាប់ពីចលនានេះ បានយល់ព្រមចំពោះសំណើរបស់អ្នកសម្របសម្រួល អេហ្ស៊ីប និងកាតាកាលពីសប្តាហ៍មុន បង្ហាញពី «ការទទូចរបស់លោកលើការរារាំងកិច្ចព្រមព្រៀងនេះ»។

ក្រុមហាម៉ាស បានសង្កត់ធ្ងន់ថា កិច្ចព្រមព្រៀងឈប់បាញ់ គឺជាមធ្យោបាយតែមួយគត់ ដើម្បីដោះលែងចំណាប់ថ្នូរអ៊ីស្រាអែលទាំងអស់ ហើយបានឲ្យលោក ណេតាន់យ៉ាហ៊ូ ទទួលខុសត្រូវទាំងស្រុងចំពោះជោគវាសនារបស់ពួកគេ។

នាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ កាលពីថ្ងៃព្រហស្បតិ៍ បាននិយាយថា លោកបានណែនាំក្រុមមន្ត្រីឲ្យចាប់ផ្តើម «ការចរចាជាបន្ទាន់» សម្រាប់ការដោះលែងចំណាប់ខ្មាំង នៅតំបន់ហ្កាហ្សា និងការបញ្ចប់សង្រ្គាមនេះ ខណៈពេលដែលលោក ក៏បានប្តេជ្ញាអនុម័តផែនការយោធា ដើម្បីដណ្តើមគ្រប់គ្រងទីក្រុងហ្កាហ្សាផងដែរ។

លោក ណេតាន់យ៉ាហ៊ូ មិនបាននិយាយថាតើការចរចានឹងចាប់ផ្តើមដោយរបៀបណា ឬនៅទីណានោះទេ។ គេហទំព័រព័ត៌មាន Ynet របស់អ៊ីស្រាអែល ដែលបានដកស្រង់សម្តីមន្ត្រីជាន់ខ្ពស់ម្នាក់ បានរាយការណ៍ថា គ្មានគណៈប្រតិភូ ត្រូវបានគេរំពឹងថា នឹងចេញដំណើរទៅទីក្រុងដូហា (Doha) ឬ ទីក្រុងគែរ(Cairo) ក្នុងដំណាក់កាលនេះទេ។