អនុរដ្ឋមន្ត្រីការបរទេសចិនលោក Ma Zhaoxu បាននិយាយថា ប្រទេសចិនពេញចិត្តក្នុងការរក្សាជំហររឹងមាំដោយភាគីចាប់អារម្មណ៍ទាំងអស់ ក្នុងការដោះស្រាយបញ្ហានុយក្លេអ៊ែរអ៊ីរ៉ង់ តាមរយៈមធ្យោបាយនយោបាយ។

គេហទំព័ររបស់ក្រសួងការបរទេសចិន បានដកស្រង់សម្តីលោក Ma Zhaoxu ដែលបាននិយាយនៅក្នុងការសន្ទនាតាមទូរស័ព្ទ ជាមួយសមភាគីអ៊ីរ៉ង់លោក Kazem Gharibabadi ថា៖«ប្រទេសចិនសង្ឃឹមថាគ្រប់ភាគីពាក់ព័ន្ធ នឹងប្រកាន់ខ្ជាប់យ៉ាងម៉ឺងម៉ាត់ ចំពោះការដោះស្រាយបញ្ហានុយក្លេអ៊ែរអ៊ីរ៉ង់ តាមរយៈមធ្យោបាយនយោបាយ និងការទូត»។

អ្នកការទូតជាន់ខ្ពស់ចិន បានចង្អុលបង្ហាញថា ដំណើរការនៃការដោះស្រាយបញ្ហានេះគឺ «ជាថ្មីម្តងទៀត គឺស្ថិតនៅចំណុចរបត់ដ៏សំខាន់មួយ»។ យោងតាមលោក ទីក្រុងប៉េកាំង នឹងខិតខំបង្កើតលក្ខខណ្ឌអំណោយផលសម្រាប់ការចាប់ផ្តើមឡើងវិញនៃកិច្ចសន្ទនា ប្រកាន់យកគោលជំហរមិនលម្អៀង ដើរតួនាទីស្ថាបនា និងលើកទឹកចិត្តឲ្យមានវឌ្ឍនភាព ក្នុងការចរចា។

ក្រសួងការបរទេសចិន បានកត់សម្គាល់ថា លោក Gharibabadi បានវាយតម្លៃខ្ពស់ចំពោះការរួមចំណែករបស់ចិន ក្នុងការដោះស្រាយតាមផ្លូវនយោបាយ និងការទូតចំពោះបញ្ហានុយក្លេអ៊ែរអ៊ីរ៉ង់។ លោកបានបញ្ជាក់ពីការត្រៀមខ្លួនរបស់អ៊ីរ៉ង់ ក្នុងការពង្រឹងការសម្របសម្រួល ជាមួយប្រទេសចិន។