នាយករដ្ឋមន្រ្តីអ៊ីស្រាអែលលោក Benjamin Netanyahu បានថ្លែងទៅកាន់គណៈរដ្ឋមន្រ្តីសន្តិសុខអ៊ីស្រាអែលកាលពីថ្ងៃអាទិត្យម្សិលមិញ បន្ទាប់ពីកងទ័ពអាកាសអ៊ីស្រាអែលវាយប្រហារទីក្រុង Sanaa របស់ប្រទេសយេម៉ែន ។

លោកថា របបភេរវកម្មហ៊ូធី ដឹងច្បាស់ថាពួកគេនឹងត្រូវសងថ្លៃខូចខាតច្រើនបែបណា ហើយពួកគេនឹងបន្តសងថ្លៃខូចខាតមួយនេះ សម្រាប់ការឈ្លានពានរបស់ពួកគេលើរដ្ឋអ៊ីស្រាអែល ។

លោក Netanyahu និយាយថា អ្នកណាក៏ដោយឲ្យតែវាយប្រហារពួកយើង ពួកយើងនឹងវាយប្រហារពួកគេវិញ ។ អ្នកណាក៏ដោយឲ្យតែមានគម្រោងវាយប្រហារពួកយើង ពួកយើងនឹងវាយប្រហារពួកគេវិញ ។ លោកមានជំនឿថា តំបន់ទាំងមូលបានជ្រាបច្បាស់ពីកម្លាំង និងការប្តេជ្ញាចិត្តរបស់រដ្ឋអ៊ីស្រាអែល ។

ការវាយប្រហារនេះ បានកើតមានឡើងជាការសងសឹកចំពោះការវាយប្រហារមីស៊ីលរបស់ក្រុមឧទ្ទាមហ៊ូធីលើអ៊ីស្រាអែល ។ យោធាអ៊ីស្រាអែលនិយាយថា គោលដៅវាយប្រហាររួមមានទាំងទីតាំងយោធា ដែលធ្វើជាវិមានប្រធានាធិបតី រោងចក្រថាមពល ២កន្លែង និងទីតាំងឃ្លាំងស្តុកប្រេងឥន្ធនៈមួយកន្លែង ។

ទីភ្នាក់ងារសារព័ត៌មាន Saba គ្រប់គ្រងដោយក្រុមហ៊ូធី រាយការណ៍ថា ការវាយប្រហាររបស់អ៊ីស្រាអែល បានសម្លាប់មនុស្សយ៉ាងហោច ២នាក់ និងមនុស្ស ៥នាក់ផ្សេងទៀត រងរបួស ៕