អធិការបតីអាល្លឺម៉ង់រង លោក Lars Klingbeil នៅថ្ងៃចន្ទ (ទី២៥ ខែសីហា) នេះ បាននិយាយនៅឯរដ្ឋធានីរបស់ប្រទេសអ៊ុយក្រែនថា ទីក្រុងប៊ែរឡាំងនឹងចូលរួមក្នុងការផ្តល់ការធានាសន្តិសុខ សម្រាប់អ៊ុយក្រែន ជាមួយដៃគូអឺរ៉ុប ប៉ុន្តែកិច្ចពិភាក្សា គឺស្ថិតនៅដំណាក់កាលដំបូង ហើយត្រូវតែធ្វើតាមអ្វីដែលទីក្រុងគីវចង់បាន។

អំឡុងដំណើរទស្សនកិច្ចលើកដំបូងរបស់លោកទៅកាន់អ៊ុយក្រែន លោក Klingbeil បាននិយាយថា៖ «អ្វីដែលសំខាន់នោះ គឺថា ចុងក្រោយ ត្រូវតែមានការធានាសន្តិសុខ ដែលធានាបានថា អ៊ុយក្រែនលែងត្រូវបានវាយប្រហារ និងថា លោក (Vladimir) Putin លែងហ៊ានវាយប្រហារអ៊ុយក្រែនទៀតហើយ»។

លោក Klingbeil ដែលមានតួនាទីជារដ្ឋមន្ត្រីហិរញ្ញវត្ថុរបស់អាល្លឺម៉ង់ផងដែរនោះ បានបន្តថា ដើម្បីសម្រេចបាននូវគោលដៅនោះ កងទ័ពអ៊ុយក្រែនចាំបាច់ត្រូវពង្រឹង ហើយការផលិតអាវុធ នៅក្នុងប្រទេសអ៊ុយក្រែនចាំបាច់ត្រូវបង្កើន។

លោក Klingbeil បានបញ្ជាក់បន្ថែមថា ប្រទេសអាល្លឺម៉ង់នឹងចូលរួម «ទទួលខុសត្រូវ« ក្នុងការផ្តល់នូវការធានាសន្តិសុខ ប៉ុន្តែការសម្រេចនោះមិនត្រូវធ្វើឡើង «ដោយរំលងអ៊ុយក្រែន» ឡើយ ហើយដំណើរការចរចាណាមួយ ត្រូវតែចាប់ផ្តើមដោយការមានបទឈប់បាញ់។

ប្រធានាធិបតីអាមេរិក លោក Donald Trump បានជំរុញឲ្យមានការបញ្ចប់សង្រ្គាមយ៉ាងឆាប់រហ័ស ប៉ុន្តែទីក្រុងគីវ និងសម្ព័ន្ធមិត្តមានក្ដីបារម្ភថា លោកអាចស្វែងរកឲ្យមានកិច្ចព្រមព្រៀងទាំងបង្ខំ តាមលក្ខខណ្ឌរបស់រុស្ស៊ី៕