កំពង់ចាម៖ ក្រុមហ៊ុនកូកា-កូឡា កម្ពុជា បានសម្ពោធប៉មចម្រោះទឹកស្អាតAqua Towers និងម៉ាស៊ីនលាងសម្អាតបន្ទប់ទឹកគម្រោងទី៣២ ដែលនាំមកនូវទឹកស្អាត ដល់សិស្សជាង១៣០០នាក់នៅវិទ្យាល័យ ហ៊ុន សែន គរ និងសាលាបឋមសិក្សា ប៊ុន រ៉ានី ឃុំគរ ស្រុកព្រៃឈរ ខេត្តកំពង់ចាម។
នេះគឺជាប៉មចម្រោះទឹកស្អាត Aqua Towers ទី១ ដែលត្រូវបានដំឡើងក្នុងឆ្នាំ២០២២ ដែលជាផ្នែកមួយនៃគម្រោងAqua Tower បន្ថែមពីលើប៉មចម្រោះទឹកចំនួន៣១ផ្សេងទៀត ដែលត្រូវបានដាក់អោយដំណើរការរួចហើយ នៅទូទាំងប្រទេសកម្ពុជា គិតចាប់ពីឆ្នាំ២០១៦មក។ ក្រុមហ៊ុនកូកា-កូឡា កម្ពុជា ក្រោមការសហការជាមួយនឹងមូលនិធិ Planet Water មានគោលបំណងផ្តល់លទ្ធភាពទទួលបានទឹកស្អាត និងសុវត្ថិភាព ព្រមទាំងកន្លែងលាងសម្អាតដៃដល់ប្រជាជនប្រហែល ១២.៦០០នាក់ក្នុងមួយថ្ងៃ ដោយផ្តោតលើកុមារអាយុចាប់ពី១២ឆ្នាំឡើងទៅ។ លើសពីនេះទៀត គម្រោងនេះមានគោលបំណងជំរុញការផ្លាស់ប្តូរឥរិយាបថពាក់ព័ន្ធ នឹងការលើកកម្ពស់ការអនុវត្តកម្មវិធីអប់រំសុខភាពការប្រើប្រាស់ទឹកស្អាតប្រកបដោយប្រសិទ្ធភាព និងការថែរក្សាអនាម័យផ្ទាល់ខ្លួន សម្រាប់សិស្សានុសិស្សក្នុងចំនួនរហូតដល់ ៤.៦៥៥នាក់ ព្រមទាំងបង្កើនការចូលរួមរបស់សហគមន៍ជុំវិញបញ្ហាដែលពាក់ព័ន្ធនឹងលទ្ធភាពទទួលបានទឹកស្អាត។
បន្ទាប់ពីដំឡើងប៉មជម្រោះទឹកស្អាតAqua Towerរួច ឯកឧត្តម ផាន អូន ប្រតិភូរាជរដ្ឋាភិបាលទទួលបន្ទុកជាអគ្គនាយកនៃអគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ (ក.ប.ប) បានថ្លែងថា ការបង្កើនផ្គត់ផ្គង់ទឹកស្អាត និងអនាម័យ និងការគ្រប់គ្រងធនធានទឹកប្រកបដោយប្រសិទ្ធភាព ពិតជាអាចជំរុញកំណើនសេដ្ឋកិច្ច និងការរីកចម្រើនរបស់សង្គមជាតិ និងអាចរួមចំណែកយ៉ាងច្រើនដល់ការកាត់បន្ថយភាពក្រីក្រ ហើយក្នុងនាមជាប្រជាពលរដ្ឋឃុំគរ នៃស្រុកព្រៃឈរ សូមថ្លែងអំណរគុណយ៉ាងជ្រាលជ្រៅចំពោះក្រុមហ៊ុនកូកា-កូឡាកម្ពុជា និងក្រុមការងារស្ម័គ្រ សម្រាប់ AQUA TOWER តាមរយៈគំនិតផ្តួចផ្តើមទឹកស្អាតរបស់កូកា-កូឡាវានឹងធានាថាកុមារនៅទីនេះនៅក្នុងស្រុកព្រៃឈរ នឹងធំឡើងនៅក្នុងប្រព័ន្ធអេកូឡូស៊ីដែលមានសុខភាពល្អជាមួយនឹងទឹកស្អាត និងសុវត្ថិភាព។
ជាមួយគ្នានោះដែរ លោក Arup Sinha Roy នាយកផ្នែកហិរញ្ញវត្ថុប្រចាំប្រទេសនៃក្រុមហ៊ុនកូកា-កូឡា កម្ពុជា បានថ្លែងថា៖ ការប្តេជ្ញាចិត្តរបស់យើងមិនបញ្ឈប់នៅត្រឹមតែការតំឡើងប៉មចម្រោះទឹកស្អាតថ្មីក្នុងថ្ងៃនេះប៉ុណ្ណោះទេ។ យើងនឹងបន្តគាំទ្រនិងសហការយ៉ាងពេញទំហឹងជាមួយមូលនិធិPlanet Water ក្នុងការអនុវត្តកម្មវិធីអប់រំសុខភាពការប្រើប្រាស់ទឹកស្អាតប្រកបដោយប្រសិទ្ធភាព ក្នុងការថែរក្សាអនាម័យបរិស្ថានការអប់រំបណ្តុះបណ្តាលប្រជាសហគមន៍អំពីការថែរក្សាការពារប៉មចម្រោះទឹកនេះរួមទាំងការធ្វើលំហែទាំរយៈពេល៥ឆ្នាំក្រោយការដំឡើងនេះ។ នៅក្រុមហ៊ុន បរិស្ថាន សង្គម និងអភិបាលកិច្ច (ESG) គឺជាចក្ខុវិស័យរបស់យើងដែលបានផ្សារភ្ជាប់ទៅនឹងរបៀបដែលយើងប្រតិបត្តិការអាជីវកម្ម។ កត្តាប្រាក់ចំណេញមានសារៈសំខាន់ប៉ុន្តែមិនមែនមានតែកត្តានេះតែមួយមុខទេ។ កត្តាធនធានមនុស្សនិងការយកចិត្តទុកដាក់ទៅលើភពផែនដីរិតតែសំខាន់។ហើយនោះជាមូលហេតុដែលគំនិតផ្តួចផ្តើមESG របស់យើងគឺផ្តោតលើការបង្កើតអាជីវកម្មប្រកបដោយចីរភាពជាងមុន និងផ្តល់នូវអនាគតរួមគ្នាកាន់តែប្រសើរដោយបង្កើតភាពខុសគ្នាជាវិជ្ជមានអំពីការរស់នៅរបស់ប្រជាជនសហគមន៍និងភពផែនដីរបស់យើង។ ចក្ខុវិស័យនេះបង្កើតអោយមានសសរស្តម្ភធំៗចំនួន៥រួមមាន៖ ពិភពលោកគ្មានសំរាម ការផ្តល់ទឹកស្អាតត្រលប់ទៅសហគមន៏វិញ ការផ្តល់ភាពអង់អាចដល់ស្រ្តី អាកាសធាតុ និងសុខុមាលភាពសហគមន៍។ ក្នុងរយៈពេលមួយទសវត្សរ៍ចុងក្រោយនេះ ក្រុមហ៊ុនកូកា-កូឡា កម្ពុជា បានពង្រីកភាពជាដៃគូរបស់ខ្លួនជាមួយមូលនិធិPlanet Water ដែលរហូតមកដល់ពេលនេះក្រុមហ៊ុនបានដំឡើងប៉មចម្រោះទឹកស្អាតAqua Towers និងម៉ាស៊ីនលាងសម្អាតបន្ទប់ទឹក Aqua San ចំនួន៣១កន្លែង សម្រាប់ប្រជាជន ៥៥.០០០នាក់ក្នុងសហគមន៍ជនបទដាច់ស្រយាល និងខ្វះខាតទឹកក្នុងខេត្តចំនួន១៦។ នៅឆ្នាំនេះ ក្រុមហ៊ុនរំពឹងថានឹងដំឡើងប៉មចម្រោះទឹកនិងម៉ាស៊ីនលាងសម្អាតបន្ទប់ទឹកចំនួន៩ទៀត នៅតំបន់ដែលខ្វះខាតទឹកស្អាតប្រើប្រាស់។ ជាមួយនឹងការដំឡើងបន្ថែមទាំងនេះ នឹងបម្រើជាប្រយោជន៍ដល់សហគមន៍នានានៅទូទាំង ២៥ខេត្ត-ក្រុង នៃព្រះរាជាណាចក្រកម្ពុជា៕អត្ថបទ៖ រដ្ឋា