ក្រុមបាតុករប្រមូលផ្ដុំគ្នាតវ៉ា ដោយបិទផ្លូវហាយវេជាច្រើនកន្លែងនៅភាគខាងត្បូងក្នុងទីក្រុង Tel Aviv និងផ្លូវប្រសព្វផ្សេងទៀតទូទាំងអ៊ីស្រាអែល នៅព្រឹកថ្ងៃអង្គារ (២៦ សីហា) នេះ ខណៈក្រុមគ្រួសារចំណាប់ថ្នូរជំរុញឱ្យប្រជាជនអ៊ីស្រាអែល ចេញតវ៉ាទ្រង់ទ្រាយធំទូទាំងប្រទេស និងទាមទារឱ្យរដ្ឋាភិបាលបញ្ឈប់សង្គ្រាមហ្កាហ្សា ព្រមទាំងចាត់វិធានការបន្ទាន់ដើម្បីសម្រេចកិច្ចព្រមព្រៀងដោះលែងចំណាប់ថ្នូរនៅសេសសល់ ៥០នាក់ទៀត ក្នុងដៃក្រុមហាម៉ាស។

នគរបាលអ៊ីស្រាអែល បញ្ជាក់ថា ផ្លូវទាំងអស់ទូទាំងប្រទេស នៅតែបើកឱ្យចរាចរណ៍ បន្ទាប់ពីមានសេចក្តីរាយការណ៍ថា ក្រុមអ្នកតវ៉ានាំគ្នាបិទផ្លូវជាច្រើនខ្សែ។ វីដេអូនៃការតវ៉ាបានបង្ហាញឱ្យឃើញក្រុមបាតុករកាន់ស្លាកសរសេរថា "បាតុកម្មនឹងឈប់នៅពេលអ្នកគ្រប់គ្នាត្រឡប់មកវិញ" ព្រមទាំងដុតភ្នក់ភ្លើងធំៗនៅតាមដងផ្លូវ។

ថ្ងៃអង្គារនេះជាសប្តាហ៍ទីពីរជាប់ៗគ្នាហើយ ដែលគ្រួសារចំណាប់ថ្នូរអំពាវនាវឱ្យមានកូដកម្មថ្នាក់ជាតិទូទាំងប្រទេស។ កាលពីថ្ងៃអាទិត្យចុងសប្តាហ៍មុន ជនជាតិអ៊ីស្រាអែលជិតកន្លះលាននាក់ ប្រមូលផ្តុំគ្នានៅទីលានចតុរង្គ និងផ្លូវជុំវិញក្នុងទីក្រុង Tel Aviv ហើយក៏ទាមទារឱ្យបញ្ចប់សង្គ្រាម និងធ្វើកិច្ចព្រមព្រៀងដើម្បីនាំយកចំណាប់ថ្នូរមកវិញ។

គួរឱ្យដឹងថា ចំណាប់ថ្នូរតំបន់ហ្កាហ្សា នៅសល់ ៥០នាក់ទៀត ដែល ៤៩នាក់ក្នុងនោះ ត្រូវចាប់ខ្លួនជាមួយមនុស្សសរុប ២៥១នាក់ អំឡុងការវាយប្រហារពីពួកហាម៉ាស កាលថ្ងៃទី៧ តុលា ឆ្នាំ២០២៣ ចំណែកម្នាក់ទៀតគឺជាសាកសពទាហានអ៊ីស្រាអែល ដែលត្រូវសម្លាប់កាលឆ្នាំ២០១៤។ មន្រ្តីអ៊ីស្រាអែល បានប្រកាសហើយថា ក្នុងចំណោមអ្នកនៅសេសសល់នោះ មាន ២៨នាក់បានស្លាប់បាត់ទៅហើយ ខណៈ ២០នាក់ត្រូវជឿថានៅរស់ ចំណែកជោគវាសនាមនុស្ស ២នាក់ទៀត នៅមិនទាន់ដឹងនៅឡើយ៕