ព្យុះធូលីដ៏ធំសម្បើម បានវាយប្រហារផ្នែកខ្លះនៃទីក្រុងរណប ហ្វីនិច (Phoenix) រដ្ឋអារីហ្សូណា របស់សហរដ្ឋអាមេរិក កាលពីល្ងាចថ្ងៃចន្ទ (២៥ សីហា) ដោយបានធ្វើឱ្យទីក្រុងនេះធ្លាក់ទៅក្នុងភាពមើលឃើញជិតស្មើសូន្យ ហើយបង្កការរំខានយ៉ាងទូលំទូលាយ ធ្វើឱ្យដើមឈើបាក់រលំ ការខូចខាតដោយកម្លាំងខ្យល់ និងការដាច់ចរន្តអគ្គិសនី។

ព្យុះធូលីត្រូវបន្តពីក្រោយដោយផ្គររន្ទះយ៉ាងខ្លាំងក្លា ដែលកើតឡើងពាសពេញទីក្រុង រួមទាំងអាកាសយានដ្ឋាន Phoenix Sky Harbor ជាទីដែលស្ពានតភ្ជាប់មួយកន្លែងរងការខូចខាតដោយខ្យល់បក់បោកក្នុងល្បឿនជាង ១១០គីឡូម៉ែត្រក្នុងមួយម៉ោង ហើយជើងហោះហើរត្រូវបានរំខាន។

សេវាអាកាសធាតុជាតិនៅទីក្រុង Phoenix បានចេញទាំងការព្រមានពីព្យុះធូលី និងផ្គររន្ទះធ្ងន់ធ្ងរ ខណៈប្រព័ន្ធអាកាសធាតុនេះរំកិលចូលទៅក្នុងតំបន់ Maricopa កាលពីល្ងាចថ្ងៃចន្ទ។ សេវាអាកាសធាតុក៏ព្រមានអ្នកបើកបរ ឱ្យប្រយ័ត្នពីកម្រិតនៃការមើលឃើញជិតស្មើសូន្យ ហើយជំរុញឱ្យអ្នកស្រុកប្រុងប្រយ័ត្នដើម្បីសុវត្ថិភាព។

បន្ទាប់ពីព្យុះនេះបានបោកបក់រួច អតិថិជនជាង ៦ម៉ឺនគ្រួសារនៅក្នុងរដ្ឋអារីហ្សូណា ពុំមានថាមពលប្រើប្រាស់ ដោយភាគច្រើននៃការដាច់ចរន្តបានប្រមូលផ្តុំនៅក្នុងតំបន់ Maricopa នេះបើយោងតាមគេហទំព័រតាមដានការដាច់អគ្គិសនី PowerOutage របស់សហរដ្ឋអាមេរិក៕