ប្រទេសហ្ស៊កដានីកាលពីថ្ងៃចន្ទ បានថ្កោលទោសចំពោះការវាយប្រហារលើរថយន្តសង្គ្រោះរបស់ហ្ស៊កដានីដែលកំពុងធ្វើដំណើរទៅកាន់តំបន់ហ្កាហ្សាស្ទ្រីបដោយអ្នកតាំងលំនៅអ៊ីស្រាអែល ដោយពណ៌នាអំពីសកម្មភាពរបស់ពួកគេថា ពិតជាមានគ្រោះថ្នាក់សម្រាប់អ្នកបើកបរដឹកជំនួយ ក្រៅពីការរារាំងប្រតិបត្តិការមនុស្សធម៌សម្រាប់តំបន់ដែលត្រូវឡោមព័ទ្ធនេះ។

លោក Mohammad Momani អ្នកនាំពាក្យរដ្ឋាភិបាល និងជារដ្ឋមន្ត្រីក្រសួងទំនាក់ទំនងរដ្ឋាភិបាល បាននិយាយនៅក្នុងរបាយការណ៍ពីទីភ្នាក់ងារសារព័ត៌មានរដ្ឋ Petra ថា អ្នកតាំងលំនៅមួយក្រុមកាលពីល្ងាចថ្ងៃអាទិត្យ បានព្យាយាមរារាំងក្បួនរថយន្តសង្គ្រោះចំនួន ៥៩គ្រឿង ដែលក្រោយមកបានឆ្លងកាត់ចូលទៅក្នុងតំបន់ហ្កាហ្សា។

លោក Momani បានអះអាងថា រថយន្តដឹកទំនិញចំនួន ៤គ្រឿង ត្រូវបានវាយប្រហារ ដោយអ្នកតាំងទីលំនៅបានគប់ដុំថ្ម វាយកញ្ចក់រថយន្ត កាត់សំបកកង់រថយន្តឲ្យធ្លាយ ព្រមទាំងខូចខាតផ្នែកខាងមុខ និង     ចំហៀង។

មន្ត្រីហ្ស៊កដានី បានសង្កត់ធ្ងន់ថា អាជ្ញាធរអ៊ីស្រាអែលទទួលខុសត្រូវចំពោះការបរាជ័យ ក្នុងការទប់ស្កាត់ឧប្បត្តិហេតុបែបនេះ ដោយហៅការឆ្លើយតបថា «ធូររលុង» និងព្រមានថា ការវាយប្រហារនេះ បង្កហានិភ័យដល់សុវត្ថិភាពអ្នកបើកបរ រារាំងការងារជួយសង្គ្រោះ និងរំលោភលើអនុសញ្ញា និងកិច្ចព្រមព្រៀងអន្តរជាតិ។

ទន្ទឹមនឹងនេះដែរ ហ្ស៊កដានីកាលពីថ្ងៃចន្ទ បានបញ្ជូនក្បួនរថយន្តមនុស្សធម៌លើកទី ១៩៣ របស់ខ្លួន ទៅកាន់តំបន់ហ្កាហ្សា ដើម្បីចែកចាយស្បៀងអាហារសំខាន់ៗ ដែលមាននៅលើរថយន្តដឹកទំនិញចំនួន ៥៩គ្រឿង។