អង្គការមិនរកប្រាក់ចំណេញមួយ បាននិយាយកាលពីថ្ងៃចន្ទថា ឆ្មាំឆ្នេរសមុទ្ររបស់ប្រទេសលីប៊ី បានបាញ់ទៅលើនាវាមួយគ្រឿង ដែលជាកម្មសិទ្ធិរបស់ក្រុមមនុស្សធម៌ ខណៈដែលខ្លួនកំពុងប្រឹងប្រែងជួយសង្រ្គោះទូកដឹកជនអន្តោប្រវេសន៍មួយគ្រឿង ដែលកំពុងជួបគ្រោះថ្នាក់ នៅសមុទ្រមេឌីទែរ៉ាណេ។

ការវាយប្រហារនេះ ដែលបានកើតឡើងកាលពីអាទិត្យនោះ ហាក់ដូចជាមានអំពើហិង្សាខ្លាំងបំផុតមួយ ពាក់ព័ន្ធនឹងនាវាជួយសង្គ្រោះអឺរ៉ុប និងឆ្មាំឆ្នេរសមុទ្រលីប៊ី ដែលទទួលបានការបណ្តុះបណ្តាល សម្ភារៈ និងថវិកា ពីសហភាពអឺរ៉ុប។

អង្គការមនុស្សធម៌ SOS Mediterranee បាននិយាយថា ការប្រឈមមុខដាក់គ្នានេះ បានកើតឡើងប្រហែល ៤០ម៉ាយ ពីភាគខាងជើងនៃឆ្នេរសមុទ្រលីប៊ី ហើយបានចេញផ្សាយព័ត៌មានលម្អិត និងរូបភាពនៃឧប្បត្តិហេតុនេះ។ ពុំមានអ្នកស្លាប់និងរបួស ត្រូវបានរាយការណ៍ទេ ទោះបីជាក្រុមនេះ បាននិយាយថា នាវានេះ មានការខូចខាតយ៉ាងដំណំក៏ដោយ។

អង្គការនេះ ប្រើប្រាស់នាវា Ocean Viking ដែលមានទង់ជាតិន័រវែស ក្នុងភាពជាដៃគូជាមួយសហព័ន្ធ កាកបាទក្រហម និងសង្គមអឌ្ឍចន្ទក្រហមអន្តរជាតិ។

អ្នកនាំពាក្យឆ្មាំឆ្នេរលីប៊ី មិនបានឆ្លើយតបនឹងសំណើសុំការអត្ថាធិប្បាយទេ។