មន្ត្រីក្រសួងការបរទេសម្នាក់ កាលពីថ្ងៃចន្ទ (ទី២៥ ខែសីហា) បានប្រាប់ឲ្យដឹងថា ប្រធានាធិបតីស៊ីរី លោក Ahmed al-Sharaa នឹងចូលរួមថ្លែងនៅឯមហាសន្និបាតអង្គការសហប្រជាជាតិ (UN) នាខែក្រោយនេះ ដោយនាំឲ្យរូបលោកជាមេដឹកនាំស៊ីរីដំបូងគេដែលធ្វើដូច្នេះ ក្នុងរយៈពេលជាច្រើនទសវត្សរ៍។

ក្នុងលក្ខខណ្ឌមិនបញ្ចេញឈ្មោះ ខណៈដែលរូបគេមិនត្រូវបានអនុញ្ញាតឲ្យនិយាយទៅកាន់ប្រព័ន្ធផ្សព្វផ្សាយ មន្ត្រីរូបនេះបានបញ្ជាក់ថា លោក Al-Sharaa «នឹងចូលរួមនៅក្នុងមហាសន្និបាតអង្គការសហប្រជាជាតិនៅទីក្រុងញូវយ៉ក សហរដ្ឋអាមេរិក ជាកន្លែងដែលលោកនឹងថ្លែងសុន្ទរកថា»។

គួរបញ្ជាក់ថា លោក Al-Sharaa បានឡើងកាន់អំណាចក្នុងខែធ្នូឆ្នាំមុន បន្ទាប់ពីក្រុមរបស់លោក បានដឹកនាំក្រុមចម្រុះនៃកងកម្លាំងប្រឆាំង ដែលបានផ្តួលរំលំមេដឹកនាំដ៏យូរលង់ គឺលោក Bashar al-Assad បន្ទាប់ពីមានសង្រ្គាមស៊ីវិលយ៉ាងខ្លាំងក្លាជិត ១៤ឆ្នាំ។

មន្ត្រីរូបនោះបានប្រាប់បន្ថែមថា៖ «លោកនឹងក្លាយជាប្រធានាធិបតីស៊ីរីដំបូងគេដែលឡើងនិយាយនៅឯអង្គការសហប្រជាជាតិ គិតចាប់តាំងពីអតីតប្រធានាធិបតី Nureddin al-Atassi (ក្នុងឆ្នាំ១៩៦៧) និងជាប្រធានាធិបតីស៊ីរីដំបូងដែលមិនធ្លាប់ចូលរួមក្នុងសប្តាហ៍ជាន់ខ្ពស់នៃមហាសន្និបាត ដែលគ្រោងនឹងធ្វើឡើងនៅថ្ងៃទី ២២-៣០ ខែកញ្ញា»។

ចាប់តាំងពីឡើងកាន់អំណាចមក អាជ្ញាធរថ្មីរបស់ស៊ីរីទទួលបានការគាំទ្រទាំងក្នុងតំបន់ និងអន្តរជាតិ។ កាលពីខែមេសា រដ្ឋមន្ត្រីការបរទេសស៊ីរី លោក Asaad al-Shaibani បានថ្លែងទៅកាន់អង្គការសហប្រជាជាតិជាលើកដំបូង ហើយបានលើកទង់ជាតិថ្មីរបស់ប្រទេសលោក នៅទីស្នាក់ការកណ្តាលរបស់ស្ថាប័នដ៏ធំនេះ ក្នុងទីក្រុងញូវយ៉ក៕