ក្រុមហ៊ុននាំចេញរបស់ប្រទេសឥណ្ឌាកំពុងត្រៀមទប់ទល់ការធ្លាក់ចុះយ៉ាងខ្លាំងនៃការបញ្ជាទិញរបស់សហរដ្ឋអាមេរិក ខណៈទីក្រុងវ៉ាស៊ីនតោនបានបញ្ជាក់ពីការដំឡើងពន្ធខ្ពស់ថ្មីទៅលើទំនិញរបស់ប្រទេសនៅអាស៊ីខាងត្បូងមួយនេះដែលត្រូវចូលជាធរមាននៅថ្ងៃពុធ ទី២៧ ខែសីហានេះ ដោយបង្កើនភាពតានតឹងផ្នែកពាណិជ្ជកម្មរវាងដៃគូជាយុទ្ធសាស្ត្រទាំងពីរ។

ពន្ធបន្ថែម២៥ភាគរយដែលត្រូវបានប្រកាសដោយលោកប្រធានាធិបតី Donald Trump និងបានបញ្ជាក់នៅក្នុងសេចក្តីជូនដំណឹងដោយក្រសួងសន្តិសុខមាតុភូមិសហរដ្ឋអាមេរិកយកពន្ធបន្ថែមសរុបរហូតដល់ ៥០ភាគរយក្នុងចំណោមពន្ធកម្រិតខ្ពស់បំផុតរបស់ទីក្រុងវ៉ាស៊ីនតោនជាការសងសឹកចំពោះការបង្កើនការទិញប្រេងរបស់ទីក្រុងញូវឌេលីពីប្រទេសរុស្ស៊ី ។

មន្ត្រីក្រសួងពាណិជ្ជកម្មម្នាក់បាននិយាយថា «រដ្ឋាភិបាលគ្មានសង្ឃឹមសម្រាប់ការបន្ធូរបន្ថយភ្លាមៗឬការពន្យារពេលនោះទេ»។ ក្រសួងបានសន្យាថានឹងផ្តល់ជំនួយហិរញ្ញវត្ថុដល់ក្រុមហ៊ុននាំចេញនានា និងការលើកទឹកចិត្តក្នុងការធ្វើពិពិធកម្មទៅកាន់ទីផ្សារផ្សេងទៀត រួមមានប្រទេសចិន អាមេរិកឡាទីន និងនៅមជ្ឈិមបូព៌ា។ ប្រាក់រូពីរបស់ឥណ្ឌា បានធ្លាក់ចុះដល់កម្រិតទាបបំផុតរយៈពេលបីសប្តាហ៍មកនេះទល់នឹងប្រាក់ដុល្លារ។ ពន្ធថ្មីបានអនុវត្តចាប់ពីម៉ោង ១២:០១នាទីយប់ឈានចូលថ្ងៃពុធម៉ោងក្នុងស្រុក ដោយមានករណីលើកលែងសម្រាប់ការដឹកជញ្ជូនឆ្លងកាត់ មានជំនួយមនុស្សធម៌ និងមុខទំនិញនៅក្រោមកម្មវិធីពាណិជ្ជកម្មបដិការ។ ចំណាត់ការដំឡើងពន្ធនៅថ្ងៃពុធនេះ កើតមានឡើងបន្ទាប់ពីការចរចារចំនួនប្រាំលើកដែលបានបរាជ័យ។ មន្ត្រីឥណ្ឌា សង្ឃឹមថាការដំឡើងពន្ធអាចត្រូវបានកំណត់ត្រឹម១៥ភាគរយ។ ផ្ទុយទៅវិញ ភាគីទាំងពីរបានស្តីបន្ទោសគ្នាទៅវិញទៅមកចំពោះការវិនិច្ឆ័យមិនត្រឹមត្រូវផ្នែកនយោបាយ ដែលធ្វើឲ្យការចរចារបរាជ័យ ទោះបីជាពាណិជ្ជកម្មទ្វេភាគីមានតម្លៃជាង១៩០ពាន់លានដុល្លារក៏ដោយ។