អេឡិចត្រូនិក៖ ឯកឧត្តម ជា ច័ន្ទបរិបូរណ៍ ប្រធានសហព័ន្ធកីឡាអេឡិចត្រូនិកកម្ពុជាបានបញ្ជាក់ថា ប្រសិនបើការប្រកួតស៊ីហ្គេមលើកទី៣១ នៅវៀតណាមធ្វើពុំបានល្អជាងការប្រកួតស៊ីហ្គេមឆ្នាំ២០១៩ នៅហ្វីលីពីននោះទេ សហព័ន្ធនឹងពិចារណាថា គួររៀបចំការប្រកួតកីឡាអេឡិចត្រូនិកនេះក្នុងព្រឹត្តិការណ៍ស៊ីហ្គេមឆ្នាំ២០២៣ នៅកម្ពុជា ឬក៏អត់។
ការអះអាងបែបនេះធ្វើឡើងក្នុងសន្និសីទសារព័ត៌មាន ស្ដីពីដំណើរឆ្ពោះទៅការប្រកួតកីឡាស៊ីហ្គេមលើកទី៣១ នៅវៀតណាម នៅសណ្ឋាគារ Raffles Hotel Le Royal កាលពីល្ងាចថ្ងៃទី២០ ខែមករា ឆ្នាំ២០២២ ដែលសន្និសីទនេះរៀបចំឡើងដើម្បីត្រៀមរៀបចំការប្រកួតជ្រើសរើសក្រុមជម្រើសជាតិសម្រាប់វិញ្ញាសា Mobile Legends និង PUBG Mobile ចាប់ពីថ្ងៃទី២៧ ខែមករាដល់ថ្ងៃទី២០ ខែកុម្ភៈខាងមុខ។ ប្រមុខសហព័ន្ធដដែលបន្ដថា ក្នុងស៊ីហ្គេមនៅវៀតណាមនាខែឧសភា ឆ្នាំ២០២២ ខាងមុខ ឯកឧត្តមមិនចង់និយាយអំពីថា តើកីឡាអេឡិចត្រូនកម្ពុជាមានសង្ឃឹមខ្ពស់ក្នុងការដណ្ដើមមេដាយកម្រិតណានោះទេ តែឯកឧត្តមចង់ឃើញក្រាហ្វិចកើនឡើងមានន័យថា គ្រប់ការប្រកួតក្រុមកម្ពុជាធ្វើបានល្អឈានទៅវគ្គបន្ដបន្ទាប់ ពោលគឺល្អប្រសើរជាងការប្រកួតកីឡាស៊ីហ្គេមលើកទី៣០ នៅហ្វីលីពីន។ ដូច្នេះស៊ីហ្គេមឆ្នាំនេះ សហព័ន្ធនឹងពិនិត្យមើលការប្រកួតប្រជែង តើអាចឈានឡើងបន្ថែម ឬធ្លាក់ចុះ ឬរក្សានៅកម្រិតដដែល។ តែបើមិនរីកចម្រើនសោះ ឬរក្សាកម្រិតនៅដដែល ឯកឧត្តមនឹងពិចារណាជាមួយគ្នាថា តើគួររៀបចំការប្រកួតកីឡាអេឡិចត្រូនិកនៅក្នុងការប្រកួតកីឡាស៊ីហ្គេមឆ្នាំ២០២៣ នៅកម្ពុជា ឬក៏អត់។ នេះបើតាមការបញ្ជាក់របស់ឯកឧត្តម ជា ច័ន្ទបូរិបូរណ៍ រដ្ឋលេខាធិការក្រសួងព័ត៌មាន និងជាប្រធានសហព័ន្ធ។
ទន្ទឹមជាមួយគ្នា ឯកឧត្តមប្រធានសហព័ន្ធបានលើកទឹកចិត្ត និងជំរុញឲ្យកីឡាករទាំងអស់ ពិសេសក្រុមជម្រើសជាតិដែលត្រូវបានជ្រើសរើសដោយគណៈកម្មការជំនាញ ត្រូវខិតខំហ្វឹកហាត់បន្ថែមដើម្បីពង្រឹងសមត្ថភាព និងបច្ចេកទេសត្រៀមចូលរួមការប្រកួតថ្នាក់តំបន់នាពេលខាងមុខ ហើយឈានទៅសម្រេចមហិច្ឆតាស្វែងរកមេដាយជូនជាតិ ស្របពេលសហព័ន្ធបានត្រៀមផ្ដល់នូវកញ្ចប់លើកទឹកចិត្តពិសេស បើសិនពួកគេធ្វើបានសម្រេចពិតមែន។ សូមបញ្ជាក់ថា សម្រាប់ការប្រកួតជ្រើសរើសក្រុមជម្រើសជាតិនាចុងខែនេះ សម្រាប់ក្រុមជយលាភីលេខ១ ដល់លេខ៤ នឹងត្រូវបានជ្រើសរើសជាក្រុមជម្រើសជាតិកម្ពុជា ដើម្បីប្រមូលផ្ដុំហ្វឹកហាត់ អភិវឌ្ឍន៍សមត្ថភាព និងបច្ចេកទេសត្រៀមការប្រកួតកីឡាស៊ីហ្គេមនៅវៀតណាម ហើយក៏ត្រៀមដំណើរឆ្ពោះទៅស៊ីហ្គេមលើកទី៣២ ឆ្នាំ២០២៣ ដែលកម្ពុជាធ្វើជាម្ចាស់ផ្ទះផងដែរ។ ប៉ុន្ដែសម្រាប់វិញ្ញាសា PUBGM សហព័ន្ធជ្រើសរើសបាន ២ក្រុមដែលជាប់ឈ្មោះទៅប្រកួតស៊ីហ្គេមនៅវៀតណាមរួចហើយ រួមមានក្រុម APG Esports និង Orange Esports បន្ទាប់ពីក្រុមទាំងពីរបានជាប់ក្នុងការប្រកួតវគ្គជម្រុះក្នុងចំណោម ៨ក្រុមនៃការប្រកួតមុនស៊ីហ្គេម ឬ Pre-SEAGAMES កាលពីដើមឆ្នាំកន្លងទៅថ្មីៗនេះ៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
