បុរសម្នាក់ដែលរងការចោទប្រកាន់ពីបទដុតវិហារជនជាតិជ្វីហ្វ នៅទីក្រុងមែលប៊ន បានបង្ហាញខ្លួននៅតុលាការ នាថ្ងៃពុធ (ទី២៧ ខែសីហា) ជុំវិញការវាយប្រហារមួយដែលអូស្ត្រាលីប្រាប់ថា រៀបចំដោយអ៊ីរ៉ង់ ហើយបានឈានដល់ការបណ្តេញឯកអគ្គរដ្ឋទូតរបស់ទីក្រុងតេអេរ៉ង់។

កាលពីថ្ងៃទី២៦ ខែសីហា អូស្ត្រាលីបានបញ្ជាក់ថា ប្រទេសអ៊ីរ៉ង់បានប្រឹងប្រែងលាក់ការជាប់ពាក់ព័ន្ធរបស់ខ្លួន នៅក្នុងការវាយប្រហារចំនួន ២ករណី ក្នុងឆ្នាំ២០២៤ នៅវិហារជនជាតិជ្វីហ្វ Adass Israel ក្នុងទីក្រុងមែលប៊ន និងនៅភោជនីយដ្ឋានជនជាតិជីហ្វ ក្នុងទីក្រុងស៊ីដនី ដោយប្រើឧក្រិដ្ឋជន និងសមាជិកនៃក្រុមអន្ធពាលដែលត្រូវបានបង្កើតឡើង។

ទីក្រុងកង់បេរ៉ា គឺជារដ្ឋាភិបាលលោកខាងលិចចុងក្រោយបង្អស់ដែលចោទប្រកាន់អ៊ីរ៉ង់ថា បានធ្វើសកម្មភាពលួចលាក់បង្កអរិភាព នៅដែនដីរបស់ខ្លួន។ កាលពីខែកក្កដា ប្រទេសចំនួន ១៤ ក្នុងនោះមានរួមទាំងចក្រភពអង់គ្លេស សហរដ្ឋអាមេរិក និងបារាំងផងដែរ បានថ្កោលទោសនូវអ្វីដែលប្រទេសទាំងនោះហៅថា ការកើនឡើងនូវសកម្មភាពធ្វើឃាត ការចាប់ពង្រត់ និងការយាយីដោយសេវាចារកម្មអ៊ីរ៉ង់។

លោក Younes Ali Younes អាយុ ២០ឆ្នាំបានបង្ហាញខ្លួនជាលើកដំបូងតាមរយៈតំណភ្ជាប់វីដេអូ នៅតុលាការជាន់ទាប កាលពីថ្ងៃទី២៥ ខែសីហា ពាក់ព័ន្ធនឹងការវាយប្រហារលើវិហារជនជាតិជ្វីហ្វ ក្នុងខែធ្នូ ឆ្នាំ២០២៤ ដែលបានបំផ្លាញអគារ និងគម្ពីរពិសិដ្ឋ ដោយបណ្តាលឲ្យមានការខូចខាតរាប់លានដុល្លារ។

ជនជាប់ចោទ បានត្រឹមតែនិយាយ ដើម្បីបញ្ជាក់ថា រូបគេអាចស្តាប់ និងយល់អំពីដំណើរការនីតិវិធី ហើយមិនទាន់ចូលដល់ដំណាក់កាលប្រាប់ពីភាពមានទោស ឬក៏អត់នៅឡើយទេ។ មេធាវីរបស់គេ បានបដិសេធមិនធ្វើអត្ថាធិប្បាយអ្វីឡើយ ជុំវិញករណីនេះ ដែលគ្រោងនឹងដំណើរការនៅតុលាការឡើងវិញ នាថ្ងៃទី៤ ខែធ្នូ៕