បេសកជនអាមេរិកលោក Tom Barrack បាននិយាយកាលពីថ្ងៃអង្គារ (ទី២៦ ខែសីហា)ថា ទីក្រុងវ៉ាស៊ីនតោន នឹងគាំទ្រដល់ការបន្តអាណត្តិនៃកងរក្សាសន្តិភាពរបស់អង្គការសហប្រជាជាតិ (UN) នៅក្នុងប្រទេសលីបង់រយៈពេល ១ឆ្នាំបន្ថែមទៀត។

ប្រភពការទូតជាច្រើនបានប្រាប់បណ្ដាញសារព័ត៌មានថា ការបោះឆ្នោតដែលបានគ្រោងទុក នៅក្រុមប្រឹក្សាសន្តិសុខ UN ស្តីពីអនាគតនៃកងកម្លាំងរក្សាសន្តិភាព UNIFIL នៅភាគខាងត្បូងលីបង់ ដែលអាណត្តិរបស់ពួកគេ នឹងបញ្ចប់នៅថ្ងៃអាទិត្យ ត្រូវបានពន្យារពេល ស្របពេលដែលមានការប្រឆាំងពីសហរដ្ឋអាមេរិក និងអ៊ីស្រាអែល ចំពោះឯកសារព្រាងនេះ។

លោក Barrack បានប្រាប់អ្នកសារព័ត៌មានពីវិមានប្រធានាធិបតីនៃប្រទេសលីបង់ថា «គោលជំហររបស់សហរដ្ឋអាមេរិក គឺយើងនឹងឲ្យមានការបន្តរយៈពេល ១ឆ្នាំទៀត»។ តែយ៉ាងណាក្ដី លោក Barrack បានកត់សម្គាល់ដោយមិនពេញចិត្តថា កម្លាំងនេះចំណាយ «មួយពាន់លានដុល្លារក្នុងមួយឆ្នាំ»។

គួរបញ្ជាក់ថា ឯកសារព្រាងថ្មី នឹងបន្តបេសកកម្មរក្សាសន្តិភាព ដែលត្រូវបានដាក់ពង្រាយជាលើកដំបូងក្នុងឆ្នាំ១៩៧៨ ដើម្បីបែងចែកអ៊ីស្រាអែល និងលីបង់ ដោយត្រូវបានបន្តមកដោយការដកចេញ នៅចុងឆ្នាំ២០២៧។

សេចក្តីព្រាងឯកសារនោះ នឹងសម្រេច «បញ្ចប់អាណត្តិរបស់ UNIFIL» នៅថ្ងៃទី៣១ ខែធ្នូ ឆ្នាំ២០២៦ «ហើយចាប់ផ្តើមដកបន្តិចម្ដងប្រកបដោយសុវត្ថិភាព ក្នុងរង្វង់រយៈពេលមួយឆ្នាំ»៕