ប្រទេសចិនបានលើកឡើងថា វាគឺជារឿង «មិនសមហេតុផល និងមិនប្រាកដនិយម» ក្នុងការដែលស្នើឲ្យខ្លួនចូលរួមក្នុងកិច្ចពិភាក្សា ស្តីពីការរំសាយអាវុធនុយក្លេអ៊ែរ ជាមួយសហរដ្ឋអាមេរិក និងរុស្ស៊ី។

អ្នកនាំពាក្យក្រសួងការបរទេសចិន លោក Guo Jiakun បានធ្វើការកត់សម្គាល់បែបនេះ បន្ទាប់ពីប្រធានាធិបតីអាមេរិក លោក Donald Trump បាននិយាយថា លោកបានពិភាក្សា អំពីការគ្រប់គ្រងអាវុធនុយក្លេអ៊ែរជាមួយប្រធានាធិបតីរុស្ស៊ី លោក Vladimir Putin ហើយចង់ឲ្យប្រទេសចិនចូលរួមផងដែរ។

លោក Guo បាននិយាយថា៖ «កងកម្លាំងនុយក្លេអ៊ែររបស់ប្រទេសចិន និងសហរដ្ឋអាមេរិក មិនស្ថិតក្នុងកម្រិតដូចគ្នាសោះឡើយ ហើយបរិយាកាសសន្តិសុខជាយុទ្ធសាស្ត្រ និងគោលនយោបាយនុយក្លេអ៊ែររបស់ប្រទេសទាំង២ គឺខុសគ្នាទាំងស្រុង»។

លោកបានបញ្ជាក់ថា ប្រទេសចិនបន្តគោលនយោបាយមិនប្រើប្រាស់អាវុធនុយក្លេអ៊ែរជាដំបូង និងយុទ្ធសាស្ត្រការពារស្វ័យការពារនុយក្លេអ៊ែរ ដោយលោកបានបន្ថែមថា ទីក្រុងប៉េកាំងនឹងមិនចូលរួមក្នុងការប្រណាំងប្រជែងអាវុធជាមួយប្រទេសណាមួយឡើយ។

លោក Guo បានសង្កត់ធ្ងន់ថា៖ «បណ្តាប្រទេសដែលមានឃ្លាំងអាវុធនុយក្លេអ៊ែរធំជាងគេ គួរតែបំពេញប្រកបដោយភាពស្មោះត្រង់នូវការទទួលខុសត្រូវជាអាទិភាពពិសេសរបស់ពួកគេ សម្រាប់ការរំសាយអាវុធនុយក្លេអ៊ែរ»។

គួរបញ្ជាក់ថា កាលពីថ្ងៃទី២៥ ខែសីហា នៅមុនជំនួបកំពូលរបស់លោកជាមួយប្រធានាធិបតីកូរ៉េខាងត្បូងលោក Lee Jae Myung លោក Trump បានប្រាប់អ្នកសារព័ត៌មានថា៖ «រឿងមួយដែលយើងកំពុងព្យាយាមធ្វើជាមួយរុស្ស៊ី និងជាមួយប្រទេសចិន គឺការរំសាយអាវុធនុយក្លេអ៊ែរ ហើយវាមានសារៈសំខាន់ខ្លាំងណាស់»៕