ក្រសួងពាណិជ្ជកម្មចិន បានឲ្យដឹងនៅថ្ងៃពុធ (ទី២៧ ខែសីហា) នេះថា រដ្ឋមន្ត្រីពាណិជ្ជកម្មរបស់ប្រទេសចិន បានជំរុញឲ្យមានទំនាក់ទំនងកាន់តែជិតស្និទ្ធ នៅក្នុងវិស័យថាមពលថ្មី និងទីផ្សារមូលធន អំឡុងពេលមានកិច្ចពិភាក្សាជាមួយរដ្ឋមន្ត្រីវិនិយោគដែលកំពុងបំពេញទស្សនកិច្ចរបស់អារ៉ាប៊ីសាអ៊ូឌីត ខណៈដែលទីក្រុងប៉េកាំងស្វែងរកការគាំទ្រពីទីក្រុងរីយ៉ាដ សម្រាប់កិច្ចព្រមព្រៀងពាណិជ្ជកម្មជាមួយរដ្ឋឈូងសមុទ្រ។

ទីក្រុងប៉េកាំង កំពុងប្រឹងប្រែងពង្រឹងទំនាក់ទំនងពាណិជ្ជកម្មកាន់តែជិតស្និទ្ធជាមួយបណ្ដារដ្ឋឈូងសមុទ្រ ខណៈដែលខ្លួនស្វែងរកផ្លូវចេញពីសង្គ្រាមពាណិជ្ជកម្ម ២សមរភូមិ ជាមួយសហរដ្ឋអាមេរិក និងសហភាពអឺរ៉ុប ដែលបានដាក់ពន្ធលើទំនិញចិន ជុំវិញការមានក្ដីបារម្ភ អំពីតម្លៃទាប និងលទ្ធភាពដែលទំនិញមាននៅលើទីផ្សាររបស់ខ្លួនច្រើនពេក។

អំឡុងកិច្ចប្រជុំ នៅទីក្រុងប៉េកាំង កាលពីថ្ងៃអង្គារ លោក Wang Wentao របស់ប្រទេសចិន បានពិភាក្សាជាមួយលោក Khalid Al-Falih របស់ប្រទេសអារ៉ាប៊ីសាអ៊ូឌីត អំពីលទ្ធភាពនៃការធ្វើឲ្យស្របគ្នានូវគំនិតផ្តួចផ្តើមហេដ្ឋារចនាសម្ព័ន្ធ «ខ្សែក្រវាត់ និងផ្លូវ» របស់ប្រធានាធិបតីចិន លោក Xi Jinping ជាមួយនឹង «ចក្ខុវិស័យឆ្នាំ២០៣០» របស់ព្រះអង្គម្ចាស់ Saudi Mohammed Bin Salman។

សេចក្តីថ្លែងការណ៍នាថ្ងៃពុធនេះ បានឲ្យដឹងថា លោក Wang បាននិយាយថា លោកក៏បានមើលឃើញអំពីសក្តានុពល ដើម្បី «ពង្រីកទំហំពាណិជ្ជកម្មទ្វេភាគី បង្កើនកម្រិតនៃកិច្ចសហប្រតិបត្តិការវិនិយោគ ២ភាគី និងពង្រីកកិច្ចសហប្រតិបត្តិការ ក្នុងវិស័យនានា ដូចជាថាមពលថ្មី ខ្សែច្រវាក់ផ្គត់ផ្គង់ឧស្សាហកម្ម និងទីផ្សារមូលធន»៕