សម្តេច ប៉ាប ឡេអូ (Pope Leo) នៅថ្ងៃពុធ (ទី២៧ ខែសីហា) នេះ បានធ្វើការអំពាវនាវយ៉ាងខ្លាំងក្លាទៅកាន់សហគមន៍ពិភពលោកឲ្យជួយបញ្ចប់ជម្លោះជិត ២ឆ្នាំ រវាងអ៊ីស្រាអែល និងក្រុមហាម៉ាស ដោយទទូចសុំឲ្យមានបទឈប់បាញ់អចិន្ត្រៃយ៍ ការដោះលែងចំណាប់ថ្នូរដែលជាប់ឃុំខ្លួននៅតំបន់ហ្កាហ្សា និងការផ្តល់ជំនួយមនុស្សធម៌។

អំឡុងពេលយាងជួបបរិស័ទប្រចាំសប្តាហ៍ នៅបុរីវ៉ាទីកង់ សម្តេចសង្ឃកាតូលិកបានមានព្រះបន្ទូលថា៖ «ខ្ញុំជាថ្មីម្តងទៀត បានចេញការអំពាវនាវដ៏ខ្លាំងក្លាមួយ ដើម្បីឲ្យជម្លោះអាចត្រូវបានបញ្ចប់ នៅក្នុងដែនដីបរិសុទ្ធ ដែលបានបង្កឲ្យមានការភ័យខ្លាច ការបំផ្លិចបំផ្លាញ និងការបាត់បង់អាយុជីវិតយ៉ាងច្រើន»។

ព្រះអង្គបានមានបន្ទូលបន្ថែមថា៖ «ខ្ញុំអង្វរករសូមឲ្យមានការដោះលែងចំណាប់ថ្នូរទាំងអស់ ឲ្យមានបទឈប់បាញ់ជាអចិន្ត្រៃយ៍ ឲ្យមានការចូលដោយសុវត្ថិភាពនូវជំនួយមនុស្សធម៌ដោយមិនមានការរាំរាំង ហើយច្បាប់មនុស្សធម៌អន្តរជាតិ ត្រូវបានគោរពយ៉ាងពេញលេញ»។

តែយ៉ាងណាក្ដី សម្តេច ប៉ាប មិនបានដាក់ឈ្មោះអ៊ីស្រាអែល ឬក្រុមសកម្មប្រយុទ្ធហាម៉ាសប៉ាឡេស្ទីនដោយចំៗនោះឡើយ ប៉ុន្តែបានមានបន្ទូលបញ្ជាក់ថា ច្បាប់អន្តរជាតិតម្រូវឲ្យមាន «កាតព្វកិច្ចការពារជនស៊ីវិល ការហាមឃាត់ប្រឆាំងនឹងការដាក់ទណ្ឌកម្មជាសមូហភាព ការមិនឲ្យប្រើប្រាស់កម្លាំងដោយគ្មានគោលដៅច្បាស់លាស់ និងការទប់ស្កាត់ការជម្លៀសប្រជាជនដោយបង្ខំ»៕