ប្រព័ន្ធផ្សព្វផ្សាយរដ្ឋរបស់អ៊ីរ៉ង់បានរាយការណ៍នៅថ្ងៃពុធ (ទី២៧ ខែសីហា) នេះថា មន្ត្រីត្រួតពិនិត្យនុយក្លេអ៊ែររបស់អង្គការសហប្រជាជាតិ (UN) បានត្រលប់ទៅកាន់ប្រទេសអ៊ីរ៉ង់វិញជាលើកដំបូង ចាប់តាំងពីទីក្រុងតេអេរ៉ង់បានផ្អាកកិច្ចសហប្រតិបត្តិការជាមួយពួកគេ បន្ទាប់ពីមានការវាយប្រហាររបស់អ៊ីស្រាអែលលើទីតាំងនុយក្លេអ៊ែររបស់ខ្លួន។

ទីភ្នាក់ងារសារព័ត៌មានសភា ICANA បានរាយការណ៍ថា រដ្ឋមន្ត្រីការបរទេសអ៊ីរ៉ង់ លោក Abbas Araqchi បានប្រាប់សមាជិកសភាថា នៅមិនទាន់ឈានដល់កិច្ចព្រមព្រៀង អំពីថា តើទីក្រុងតេអេរ៉ង់នឹងបន្តការងារពេញលេញជាមួយអង្គការឃ្លាំមើល IAEA (ទីភ្នាក់ងារថាមពលបរមាណូអន្តរជាតិ) របស់ UN ដែរ ឬយ៉ាងណា។

ប៉ុន្តែបើយោងតាមរបាយការណ៍នោះ បានឲ្យដឹងថា លោក Araqchi បាននិយាយថា មន្ត្រីអធិការកិច្ច នឹងត្រួតពិនិត្យការផ្លាស់ប្តូរប្រេងឥន្ធនៈ នៅរោងចក្រថាមពលនុយក្លេអ៊ែរ Bushehr របស់អ៊ីរ៉ង់។

ការអត្ថាធិប្បាយរបស់លោក Araqchi ធ្វើឡើងតែមួយថ្ងៃបន្ទាប់ពីអ៊ីរ៉ង់បានជួបប្រជុំជាមួយបារាំង អង់គ្លេស និងអាល្លឺម៉ង់ ដើម្បីព្យាយាមធ្វើឲ្យការចរចាមានឡើងវិញ ពាក់ព័ន្ធនឹងកម្មវិធីនុយក្លេអ៊ែរ ដែលមហាអំណាចលោកខាងលិចនិយាយថា មានបំណងផលិតគ្រាប់បែកនុយក្លេអ៊ែរ ប៉ុន្តែប្រទេសនេះប្រាប់ថា ដំណើរការនោះផ្តោតលើគម្រោងស៊ីវិល។

អ៊ីរ៉ង់បាននិយាយថា ខ្លួនត្រូវការកិច្ចព្រមព្រៀងសហប្រតិបត្តិការថ្មីមួយជាមួយទីភ្នាក់ងារថាមពលបរមាណូអន្តរជាតិ បន្ទាប់ពីមានសង្គ្រាមអាកាសរយៈពេល ១២ថ្ងៃ ក្នុងខែមិថុនា ជាមួយអ៊ីស្រាអែល ដែលត្រូវបានចូលរួមដោយសហរដ្ឋអាមេរិករយៈពេលខ្លី៕