អំពើហិង្សាបានផ្ទុះឡើងនៅក្នុងព្រឹទ្ធសភារបស់ប្រទេសម៉ិកស៊ិក កាលពីថ្ងៃពុធ (២៧ សីហា) ជាមួយនឹងការវាយតប់ ការរុញច្រាន និងស្រែកដាក់គ្នា បន្ទាប់ពីមេដឹកនាំគណបក្សប្រឆាំងមួយរូបបានចាប់ទាញដៃប្រធានសភា នៅពេលសម័យប្រជុំកំពុងបញ្ចប់។

លោក Alejandro Moreno ប្រធានគណបក្សបដិវត្តន៍ស្ថាប័ន (PRI) ដែលជាបក្សប្រឆាំងរបស់ម៉ិកស៊ិក បានដើរតម្រង់ទៅកាន់ប្រធានព្រឹទ្ធសភា Gerardo Fernandez Norona នៃគណបក្ស Morena ដែលកំពុងកាន់អំណាច ខណៈសមាជិកសភាគោរពភ្លេងជាតិបិទបញ្ចប់សម័យប្រជុំនៅពេលនោះ។

ក្នុងវីដេអូផ្សាយបន្តផ្ទាល់បង្ហាញឱ្យឃើញថា លោក Moreno ដើរទៅកាន់លោក Norona ដោយនិយាយម្តងហើយម្តងទៀតថា "សុំអនុញ្ញាតបញ្ចេញមតិ" របស់លោក រួចបានចាប់ដៃលោក Norona ក្នុងកាយវិការហាក់ខឹងសម្បារ។ លោក Norona បដិសេធមិនឱ្យប៉ះពាល់លោក ក្រោយមកព្រឹទ្ធសមាជិកទាំងពីរក៏បានរុញច្រានគ្នាចុះឡើងយ៉ាងតានតឹង ហើយក៏ជ្រុលទៅប៉ះទង្គិចជាមួយអ្នកកាន់កាមេរ៉ាទៀតផង។

បន្ទាប់ពីភាពច្របូកច្របល់តាមការផ្សាយផ្ទាល់ដ៏អាម៉ាស់នោះ លោក Norona បានប្ដេជ្ញាកោះហៅសម័យប្រជុំបន្ទាន់មួយនៅថ្ងៃសុក្រ (២៩ សីហា) ស្អែកនេះ ហើយនឹងស្នើបណ្តេញលោក Moreno និងសមាជិកសភាបក្សប្រឆាំងនោះ ៣រូបផ្សេងទៀតដោយសារតែការប៉ះទង្គិចនេះ។ លោក Norona ក៏បានប្រាប់សន្និសីទសារព័ត៌មានពីមូលហេតុនៃភាពវឹកវរនោះថា ផ្ទុះឡើងបន្ទាប់ពី "ការជជែកដេញដោលដ៏លំបាក" អំពីវត្តមានកងកម្លាំងប្រដាប់អាវុធមកពីប្រទេសផ្សេងទៀត នៅម៉ិកស៊ិក៕