ក្រសួងឧស្សាហកម្មប្រទេសថៃ បាននិយាយនៅថ្ងៃព្រហស្បតិ៍ (២៨ សីហា) នេះថា សន្ទស្សន៍ផលិតកម្មរបស់ថៃ ឬហៅថាទិន្នន័យ MPI នៅក្នុងខែកក្កដា កន្លងទៅ បានធ្លាក់ចុះយ៉ាងគំហុកជាលើកដំបូងក្នុងរយៈពេល ៤ខែ ដោយឈានដល់កម្រិតទាបខ្លាំងបំផុតក្នុងរយៈពេលជិត ២ឆ្នាំ ដែលទន់ខ្សោយជាងការព្យាករទុកទៅទៀត បន្ទាប់ពីការធ្លាក់ចុះផលិតកម្មរថយន្ត។

ទិន្នន័យបានបង្ហាញថា ទិន្នផលរោងចក្រ MPI បានធ្លាក់ចុះ ៣,៩៨% នៅក្នុងខែកក្កដា ធៀបនឹងឆ្នាំមុន ដែលផ្ទុយស្រឡះទៅនឹងការព្យាករដែលថា អាចធ្លាក់ចុះត្រឹមតែ ១,១% ប៉ុណ្ណោះសម្រាប់ខែកក្កដា នៅក្នុងការស្ទង់មតិសេដ្ឋវិទូរបស់សារព័ត៌មានរ៉យទ័រ។ ភាពទន់ខ្សោយនេះបានកើតឡើង បន្ទាប់ពីកំណើនដែលបានកែប្រែ ក្នុងទិន្នន័យប្រចាំឆ្នាំចំនួន ០,៤១% នៅខែមិថុនា។

ក្រៅពីការធ្លាក់ចុះផលិតកម្មរថយន្ត ក្រសួងឧស្សាហកម្មថៃបាននិយាយថា ទិន្នផលទន់ខ្សោយនេះក៏ត្រូវរងទុក្ខដោយសារគោលការណ៍ខ្ចីប្រាក់ធនាគារកាន់តែតឹងរ៉ឹង និងការធ្លាក់ចុះនៃទំនុកចិត្តនៃវិស័យឧស្សាហកម្ម ស្របពេលដែលសេដ្ឋកិច្ចកំពុងតែប្រឈមនឹងបំណុលគ្រួសារខ្ពស់ខ្លាំង ក៏ដូចជាពន្ធគយរបស់សហរដ្ឋអាមេរិកផងដែរ៕