អគ្គលេខាធិការអង្គការណាតូ លោក Mark Rutte បាននិយាយនៅឯពិធីបើករោងចក្រកាំភ្លើង ធំ Rheinmetall នៅក្នុងទីក្រុង Unterluss ដែលក្លាយជារោងចក្រផលិតអាវុធធំបំផុតរបស់អឺរ៉ុបថា ប្រទេសអាល្លឺម៉ង់ នឹងដើរតួឈានមុខគេ ក្នុងការធ្វើទំនើបកម្មវិស័យយោធារបស់អឺរ៉ុប ដែលជាសេដ្ឋកិច្ចធំបំផុតរបស់តំបន់នេះ។

យោងតាមប្រធានអង្គការណាតូ អឺរ៉ុប និងសហរដ្ឋអាមេរិក ត្រូវតែលើសប្រទេសរុស្ស៊ី និងចិន ក្នុងការផលិតអាវុធ។ ដោយថ្លែងទៅកាន់តំណាងឧស្សាហកម្មយោធាអឺរ៉ុប និងអ្នកនយោបាយអាល្លឺម៉ង់ លោកបាននិយាយថា៖«យើងកំពុងជួបប្រទះបញ្ហាប្រឈម។ ប៉ុន្តែអឺរ៉ុប និងអាមេរិក ត្រូវបង្វែរនិន្នាការទៅរកផលិតកម្មការពារជាតិ ហើយខ្ញុំឃើញថា រឿងនេះគួរឲ្យចិត្តបាន ពីព្រោះមានសាច់ប្រាក់ពិតប្រាកដ ដែលអាចប្រើប្រាស់បាន ហើយថវិកាបន្ថែមទៀត នឹងហូរចូលមកជាបន្តបន្ទាប់»។

លោក Rutte បានចង្អុលបង្ហាញថា៖«នៅក្នុងកិច្ចប្រជុំកំពូលរបស់អង្គការណាតូ នៅទីក្រុងឡាអេ កាលពីពីរខែកន្លងទៅនេះ ក្រុមមេដឹកនាំនៃអង្គការណាតូ បានយល់ព្រមលើផែនការថ្មី ក្នុងការវិនិយោគ ៥% នៃផលិតផលក្នុងស្រុកសរុប (GDP) របស់ពួកគេ ក្នុងវិស័យការពារជាតិ។ ប្រទេសអាល្លឺម៉ង់ បានប្រកាសរួចហើយថា ខ្លួនគ្រោងនឹងវិនិយោគជិត ១៥៣ពាន់លានអឺរ៉ូ ក្នុងវិស័យការពារជាតិ នៅឆ្នាំ ២០២៩ ។ នេះគឺជាការកើនឡើងគួរឲ្យចាប់អារម្មណ៍ ក្នុងរយៈពេលត្រឹមតែ ៨ ឆ្នាំប៉ុណ្ណោះ។ អាល្លឺម៉ង់ កំពុងដើរតួជាអ្នកដឹកនាំ ក្នុងការធ្វើទំនើបកម្មវិស័យយោធានៅអឺរ៉ុប ហើយអ្នកត្រូវតែធ្វើវា អ្នកគឺជាប្រទេស ដែលមានសេដ្ឋកិច្ចធំបំផុត ហើយប្រទេសផ្សេងទៀត នឹងធ្វើតាម។ សម្ព័ន្ធមិត្តរបស់អង្គការណាតូ កំពុងប្រឹងប្រែងដើម្បី បណ្តាក់ទុនកាន់តែច្រើន នៅក្នុងវិស័យការពារជាតិ នៅទូទាំងទ្វីបអឺរ៉ុប នៅពេលនេះ ហើយនោះ គឺជាការល្អបំផុត។

លោកប្រធានអង្គការណាតូ បានសង្កត់ធ្ងន់ថា អឺរ៉ុបបច្ចុប្បន្នផលិតគ្រាប់កាំភ្លើងធំដល់ទៅ ៦ដង ច្រើនជាងខ្លួនផលិត កាលពី២ឆ្នាំមុន។

លោកបានថ្លែងថា៖«ឥឡូវនេះ យើងត្រូវឃើញកិច្ចខិតខំប្រឹងប្រែងស្រដៀងគ្នា ដើម្បីបង្កើន​សមត្ថភាព​ផលិតកាន់តែច្រើនប្រភេទ ដូចជារថក្រោះ ប្រព័ន្ធការពារដែនអាកាស និងមីស៊ីលជាដើម»។