មន្ត្រីយោធាអ៊ុយក្រែនម្នាក់ បាននិយាយកាលពីថ្ងៃពុធថា កងកម្លាំងលុកលុយរបស់រុស្ស៊ី បានវាយសម្រុកចូលទៅក្នុងតំបន់ទី ៨ របស់ប្រទេសអ៊ុយក្រែន ដោយស្វះស្វែងរកដណ្តើមកាន់កាប់ទឹកដីបន្ថែមទៀត នៅក្នុងសង្គ្រាមបីឆ្នាំរបស់ពួកគេ ខណៈដែលកិច្ចខិតខំប្រឹងប្រែងសន្តិភាពដឹកនាំដោយសហរដ្ឋអាមេរិក កំពុងតស៊ូ ដើម្បីទទួលបានជោគជ័យ។

លោក Victor Trehubov អ្នកនាំពាក្យសម្រាប់កងកម្លាំងជើងគោកក្នុងតំបន់ បានប្រាប់សារព័ត៌មាន AP តាមទូរស័ព្ទថា ទាហានរុស្ស៊ីមួយចំនួន បានចូលទៅក្នុងភូមិ Novoheorhiivka និង Zaporizke ក្នុងតំបន់ Dnipropetrovsk ភាគខាងកើត ដែលជាមជ្ឈមណ្ឌលឧស្សាហកម្មដ៏សំខាន់របស់អ៊ុយក្រែន នៅជាប់នឹងតំបន់ Donetsk ជាទីដែលការប្រយុទ្ធគ្នាយ៉ាងខ្លាំងក្លា បានកើតឡើង។

ក្រសួងការពារជាតិរុស្ស៊ី បានអះអាងកាលពីដើមខែនេះថា កងកម្លាំងរបស់ខ្លួន បានដណ្តើមយកបានភូមិទាំងពីរ។

លោក Trehubov បាននិយាយថា ប៉ុន្តែជនជាតិរុស្ស៊ី មិនបានជីកលេនដ្ឋាន ឬសាងសង់បន្ទាយ នៅទីនោះទេ ហើយការប្រយុទ្ធគ្នា កំពុងបន្តនៅក្នុងភូមិទាំងនោះ ។

ទាហានអ៊ុយក្រែន កំពុងស្ថិតក្នុងស្ថានភាពតានតឹងយ៉ាងខ្លាំង ខណៈពួកគេព្យាយាមទប់ទល់កងទ័ពរុស្ស៊ីដែលច្រើនជាងនោះ។ អ្នកវិភាគយោធា និយាយថា មិនមានសញ្ញាណាមួយនៃការដួលរលំនៃវិស័យការពារជាតិអ៊ុយក្រែនឡើយ ហើយកត់សម្គាល់ថា កងកម្លាំងរុស្ស៊ី មិនអាចដណ្តើមយកទីប្រជុំជន និងទីក្រុងធំៗបានទេ ប៉ុន្តែការរុលចូលទៅមុខរបស់ពួកគេឆ្លងកាត់តំបន់ជនបទមួយចំនួន ធ្វើឲ្យអ៊ុយក្រែននៅតែបន្តរង សម្ពាធ។