នាយករដ្ឋមន្ត្រីអ៊ីតាលី លោកស្រី Giorgia Meloni កាលពីថ្ងៃពុធ (ទី២៧ ខែសីហា) បានថ្កោលទោសការវាយប្រហាររបស់អ៊ីស្រាអែលលើតំបន់ហ្កាហ្សាថា លែងជាប្រតិបត្តិការសមាមាត្រទៀតហើយ ដោយបាននិយាយថា មាន «ជនរងគ្រោះដែលជាអ្នកស្លូតត្រង់ច្រើនពេក» នៅក្នុងសង្រ្គាមជិត ២ឆ្នាំដែលបង្កឡើងដោយការវាយប្រហារដឹកនាំដោយក្រុមហាម៉ាស។

នៅក្នុងសុន្ទរកថាដ៏ធំទូលាយមួយទៅកាន់សន្និសីទនយោបាយ ក្នុងទីក្រុង Rimini លោកស្រី Meloni បានអះអាងឡើងវិញនូវការគាំទ្ររបស់អ៊ីតាលី ចំពោះសិទ្ធិការពារខ្លួនរបស់អ៊ីស្រាអែល បន្ទាប់ពីមានការវាយប្រហារកាលពីថ្ងៃទី៧ ខែតុលា ឆ្នាំ២០២៣។

តែលោកស្រីបានបញ្ជាក់ថា «យ៉ាងណាក្ដី ក្នុងពេលជាមួយគ្នានេះ យើងមិនអាចនៅស្ងៀមបានឡើយ នាពេលនេះ នៅចំពោះមុខការឆ្លើយតបដែលទៅហួសពីគោលការណ៍សមាមាត្រ» ដោយលោកស្រីបានបន្ថែមថា ការបន្តការវាយប្រហារ កំពុងធ្វើឲ្យមានហានិភ័យដល់ «ការរំពឹងទុកជាប្រវត្តិសាស្ត្រ» នៃដំណោះស្រាយរដ្ឋ២។

ជាមួយគ្នានេះ លោកស្រី Meloni បានលើកឡើងពីការសម្លាប់អ្នកសារព័ត៌មាន ៥នាក់ នៅតំបន់ហ្កាហ្សា កាលពីថ្ងៃចន្ទ ដែលលោកស្រីបានប្រាប់ថា «ជាការវាយប្រហារដែលមិនអាចទទួលយកបាន លើសេរីភាពសារព័ត៌មាន និងអ្នកដែលមានភាពក្លាហានប្រថុយជីវិត ដើម្បីរៀបរាប់ឡើងវិញនូវព្រឹត្តិការណ៍សង្រ្គាម»។

ហើយលោកស្រី Meloni បានអំពាវនាវដល់សហគមន៍អន្តរជាតិឲ្យ «ដាក់សម្ពាធដែលអាចធ្វើទៅបាន ចំពោះក្រុមហាម៉ាស រហូតដល់ពួកគេព្រមដោះលែងចំណាប់ថ្នូរអ៊ីស្រាអែលដែលនៅតែត្រូវបានឃុំខ្លួន» ខណៈពេលដែលអំពាវនាវឲ្យអ៊ីស្រាអែលបញ្ឈប់ការវាយប្រហារដោយយោធា នៅក្នុងតំបន់ហ្កាហ្សា អនុញ្ញាតឲ្យមានលំហូរជំនួយមនុស្សធម៌ និងបញ្ចប់ការពង្រីកការតាំងទីលំនៅរបស់ជនជាតិជ្វីហ្វ នៅតំបន់ West Bank៕