សេដ្ឋកិច្ចរបស់ឥណ្ឌា ទំនងជាធ្លាក់ចុះក្នុងត្រីមាសពីខែមេសា ដល់ខែមិថុនា ដោយសារតម្រូវការទន់ខ្សោយ និងការវិនិយោគឯកជនយឺតយ៉ាវបានដាក់បន្ទុកលើកំណើន ហើយការដំឡើងពន្ធរបស់សហរដ្ឋអាមេរិក រំពឹងថានឹងប៉ះពាល់ដល់ការនាំចេញសំខាន់ៗ រួមទាំងវាយនភណ្ឌ ស្បែកជើង សារធាតុគីមី និងស្បៀងអាហារនៅក្នុងត្រីមាសខាងមុខទៀត។

សហរដ្ឋអាមេរិក នៅថ្ងៃពុធសប្ដាហ៍នេះ បានដំឡើងពន្ធទ្វេដងលើទំនិញឥណ្ឌា ដល់កម្រិតខ្ពស់ ៥០% ដោយលើកហេតុផលថាឥណ្ឌាបន្តទិញប្រេងរុស្ស៊ី ដែលជាអត្រាស្មើនឹងប្រេស៊ីល ប៉ុន្តែធ្ងន់ខ្លាំងបំផុតមួយក្នុងចំណោមដៃគូពាណិជ្ជកម្មរបស់សហរដ្ឋអាមេរិក ដែលសេដ្ឋរិទូនិយាយថា អាចប៉ះពាល់ដល់កំណើន និងការងារ។

ការស្ទង់មតិលើសេដ្ឋវិទូរបស់សារព័ទ៌មានរ៉យទ័របានបង្ហាញថា ផលិតផលក្នុងស្រុកសរុប GDP របស់ឥណ្ឌា ត្រូវរំពឹងថានឹងកើនឡើង ៦,៧% ធៀបនឹងឆ្នាំមុន ក្នុងខែមេសាដល់ខែមិថុនា ដោយធ្លាក់ចុះពីអត្រា ៧,៤% ក្នុងរយៈពេល ៣ខែមុននោះ។

សូម្បីតែកំណើនស្ថិតក្នុងល្បឿនយឺតបែបនេះក៏ដោយ ក៏ឥណ្ឌានៅតែជាប្រទេសមួយក្នុងចំណោមប្រទេសមានសេដ្ឋកិច្ចលូតលាស់លឿនបំផុត។ លោក Sanjay Malhotra ទេសាភិបាលធនាគារកណ្តាលឥណ្ឌានិយាយថា ធនាគារកណ្តាលរំពឹងថា កំណើនពេញមួយឆ្នាំនឹងនៅតែមានជិតដល់ទៅ ៦,៥% ហើយមើលឃើញថាមាន «ផលប៉ះពាល់តិចតួចប៉ុណ្ណោះ» ពីពន្ធខ្ពស់លើទំនិញរបស់ខ្លួន៕