ប្រមុខការពារជាតិអាល្លឺម៉ង់ លោក Boris Pistorius បាននិយាយកាលពីថ្ងៃព្រហស្បតិ៍ (២៨ សីហា) ថា រដ្ឋមន្ត្រីការពារជាតិអាល្លឺម៉ង់ បារាំង និងអេស្ប៉ាញ គ្រោងជួបប្រជុំគ្នានៅក្នុងខែតុលា ខាងមុខនេះ ដើម្បីស្វះស្វែងរកជម្រើសសម្រាប់ការទទួលបានកម្មវិធីយន្តហោះចម្បាំងរួមគ្នា FCAS របស់ភាគីទាំងបីត្រឡប់មកវិញ។

ដោយទទួលស្គាល់ថាគម្រោងនេះបានបន្តប្រឈមមុខនឹងជំហានថយក្រោយជាច្រើន លោក Pistorius បាននិយាយថា រដ្ឋមន្ត្រីទាំងបីនឹងកំណត់បញ្ហារាំងស្ទះទាំងឡាយ និងដំណោះស្រាយ មុននឹងបង្ហាញជូនមេដឹកនាំនូវជម្រើសសម្រាប់ការសម្រេចចិត្តចុងក្រោយ នៅឆ្នាំក្រោយនេះ។

ថ្លែងប្រាប់អ្នកយកព័ត៌មាននៅក្រៅកិច្ចប្រជុំជាមួយសមភាគីអេស្ប៉ាញនៅទីក្រុងប៊ែរឡាំង លោក Pistorius បាននិយាយថា៖ ភាគីទាំងអស់នឹងធ្វើការរួមគ្នា ហើយផលប្រយោជន៍ជាតិនឹងត្រូវដាក់មួយឡែក ... ជំហាននេះត្រូវតែទទួលជោគជ័យ ព្រោះគ្រប់គ្នាត្រូវការគម្រោងនេះណាស់។

គម្រោង FCAS នេះពាក់ព័ន្ធនឹងការចាប់ផ្តើមជំនួសយន្តហោះចម្បាំងបារាំង Rafale និងយន្តហោះ Eurofighters របស់អាល្លឺម៉ង់ និងអេស្ប៉ាញ ហើយដាក់យន្តហោះចម្បាំងថ្មីជំនាន់ទី៦ ចាប់ពីឆ្នាំ២០៤០។ សេចក្ដីរាយការណ៍បានឱ្យដឹងថា អាល្លឺម៉ង់បន្ទោសឧស្សាហកម្មបារាំង ចំពោះការបង្អាក់ដំណាក់កាលបន្ទាប់ក្នុងការអភិវឌ្ឍកម្មវិធីយន្តហោះចម្បាំង FCAS មួយនេះ ដែលត្រូវប៉ាន់ប្រមាណថាមានតម្លៃជាង ១០០ពាន់លានអឺរ៉ូ (១១៧ ពាន់លានដុល្លារអាមេរិក) ដោយសារតែ ឧស្សាហកម្មបារាំងនោះទាមទារធ្វើជាអ្នកដឹកនាំតែមួយគត់នៃគម្រោង៕