ទិន្នន័យបានបង្ហាញនៅថ្ងៃសុក្រ (២៩ សីហា) នេះថា ទិន្នផលរោងចក្ររបស់ជប៉ុន បានធ្លាក់ចុះក្នុងខែកក្កដា ដោយសារតែឥទ្ធពលពន្ធគយរបស់សហរដ្ឋអាមេរិក និងសូចនាករឈានមុខគេនៃអតិផរណាទូទាំងប្រទេសធ្លាក់ចុះ ដោយបង្កភាពស្មុគស្មាញកាន់តែខ្លាំងដល់ការសម្រេចចិត្តរបស់ធនាគារកណ្តាល លើការកំណត់ពេលដំឡើងអត្រាការប្រាក់បន្ទាប់។

អត្រាគ្មានការងារធ្វើរបស់ជប៉ុន ធ្លាក់ដល់កម្រិតទាបជាច្រើនឆ្នាំនៅខែកក្កដា ដោយសារទីផ្សារការងារតឹងតែង ប៉ុន្តែការលក់រាយបានកើនឡើងតិចជាងការរំពឹងទុក ក្នុងសញ្ញាមួយដែលបង្ហាញថា កំណើនថ្លែចំណាយប្រចាំថ្ងៃកំពុងដាក់បន្ទុកលើការប្រើប្រាស់។

ទិន្នន័យរបស់រដ្ឋាភិបាលបង្ហាញថា ទិន្នផលឧស្សាហកម្មធ្លាក់ចុះ ១,៦% ក្នុងខែកក្កដា ធៀបនឹងខែមុន ដែលច្រើនជាងការព្យាករទីផ្សារថាអាចថយ ១,០% ប៉ុណ្ណោះ មួយផ្នែកដោយសារតែការធ្លាក់ចុះ ៦,៧% នៃផលិតកម្មរថយន្ត។ ក្រុមហ៊ុនផលិតដែលត្រូវបានស្ទង់មតិដោយរដ្ឋាភិបាលរំពឹងថា ទិន្នផលនឹងកើនឡើងវិញ ២,៨% ក្នុងខែសីហានេះ តែអាចធ្លាក់ ០,៣% នៅខែកញ្ញា។

ខណៈដែលកិច្ចព្រមព្រៀងពាណិជ្ជកម្មទ្វេភាគីក្នុងខែកក្កដា ទំនងជានឹងកាត់បន្ថយពន្ធរបស់សហរដ្ឋអាមេរិក លើរថយន្តជប៉ុន មកត្រឹម ១៥% នោះ ភាពមិនច្បាស់លាស់នៅតែមានទៅលើថា តើនៅពេលណាដែលពន្ធនេះនឹងត្រូវអនុវត្ត ដោយសារតែលោកប្រធានាធិបតី Donald Trump មិនទាន់បានចុះហត្ថលេខាលើក្រឹត្យផ្លូវការនៅឡើយទេ៕