រដ្ឋមន្ត្រីការបរទេសអ៊ីតាលី លោក Antonio Tajani បាននិយាយកាលពីថ្ងៃព្រហស្បតិ៍ (២៨ សីហា) ថា សង្រ្គាមរបស់រុស្ស៊ី លើអ៊ុយក្រែន ទំនងជាមិនបញ្ចប់នៅក្នុងឆ្នាំនេះទេ ខណៈទីក្រុងមូស្គូ បង្កើនការវាយប្រហារកាន់តែខ្លាំងឡើងលើទីក្រុងនានាទូទាំងប្រទេសអ៊ុយក្រែន។

ថ្លែងបន្ទាប់ពីកិច្ចប្រជុំគណៈរដ្ឋមន្ត្រីនៅទីក្រុងរ៉ូម លោក Tajani បានលើកឡើងថា៖ សង្រ្គាមនេះនឹងមិនបញ្ចប់ក្នុងពេលឆាប់ៗដូចដែលមនុស្សគ្រប់គ្នាបាននិយាយ និងជឿជាក់នោះទេ។ លោកបន្ថែមថា លោកមិនចង់ក្លាយជាមនុស្សទុទិដ្ឋិនិយមឡើយ ប៉ុន្តែក្នុងគំនិតរបស់លោក គឺថាមិនអាចមានដំណោះស្រាយមុនដំណាច់ឆ្នាំនេះបានទេ។

ការអត្ថាធិប្បាយរបស់ប្រមុខការទូតអ៊ីតាលីរូបនេះ បានកើតឡើងស្របពេលមនុស្សជាង ២០នាក់ រួមទាំងកុមារជាច្រើននាក់ ត្រូវបានសម្លាប់នៅទីក្រុងគីវកាលពីថ្ងៃព្រហស្បតិ៍ បន្ទាប់ពីការវាយប្រហារដោយមីស៊ីល និងយានដ្រូនរបស់រុស្ស៊ី ដែលធ្វើឱ្យខូចខាតដល់អគារបេសកកម្មរបស់សហភាពអឺរ៉ុប និងការិយាល័យក្រុមប្រឹក្សាអង់គ្លេស នៅរដ្ឋធានីអ៊ុយក្រែននេះផងដែរ។

នៅថ្ងៃព្រហស្បតិ៍ដដែលនោះ វិមានក្រឹមឡាំងនិយាយថា ខ្លួននៅតែចាប់អារម្មណ៍ក្នុងការបន្តកិច្ចចរចាសន្តិភាពលើអ៊ុយក្រែន បើទោះបីជារុស្ស៊ី នៅតែបន្តការវាយប្រហារក៏ដោយ ហើយអ្នកនាំពាក្យវិមានក្រឹមឡាំង លោក Dmitry Peskov បានប្រាប់អ្នកសារព័ត៌មានថា ភាគីជម្លោះទាំងពីរកំពុងតែបន្តវាយប្រហារគ្នាទៅវិញទៅមក៕