រដ្ឋមន្ត្រីក្រសួងហិរញ្ញវត្ថុរបស់អ៊ីស្រាអែល លោក Bezalel Smotrich កាលពីថ្ងៃព្រហស្បតិ៍ បានអំពាវនាវឲ្យរដ្ឋាភិបាល ចាប់ផ្តើមដាក់ផ្នែកខ្លះនៃតំបន់ហ្កាហ្សាស្ទ្រីបជាឧបសម្ព័ន្ធរបស់ប្រទេសនេះ ប្រសិនបើក្រុមសកម្មប្រយុទ្ធប៉ាឡេស្ទីនហាម៉ាស នៅតែបន្តបដិសេធមិនទម្លាក់អាវុធរបស់ខ្លួននោះ។

រដ្ឋមន្ត្រីស្តាំនិយមជ្រុល ដែលបានប្រឆាំងជំទាស់ជាដាច់ខាតចំពោះការធ្វើកិច្ចព្រមព្រៀងណាមួយជាមួយក្រុមហាម៉ាស ដើម្បីបញ្ចប់សង្រ្គាមជិតពីរឆ្នាំនោះ បានបង្ហាញផែនការរបស់ខ្លួន ដើម្បី«ឈ្នះនៅតំបន់ហ្កា ហ្សា នៅចុងឆ្នាំនេះ» ក្នុងសន្និសីទសារព័ត៌មានមួយ នៅក្នុងទីក្រុងហ្ស៊េរុយសាឡឹម។

នៅក្រោមសំណើរបស់លោក Smotrich ក្រុមហាម៉ាស នឹងត្រូវបានផ្តល់ឱសានវាទឲ្យចុះចាញ់ ទម្លាក់ អាវុធ និងដោះលែងចំណាប់ថ្នូរ ដែលកំពុងត្រូវបានឃុំខ្លួនក្នុងតំបន់ហ្កាហ្សា ចាប់តាំងពីការវាយប្រហារនៅខែតុលា ឆ្នាំ ២០២៣ របស់ក្រុមនេះ ដែលបានបង្កឲ្យមានសង្រ្គាមនេះ។

ប្រសិនបើក្រុមហាម៉ាស នៅតែមិនព្រម លោក Smotrich បាននិយាយថា អ៊ីស្រាអែល គួរតែដាក់បញ្ចូលផ្នែកមួយនៃទឹកដីនេះ ជាឧបសម្ព័ន្ធ រៀងរាល់សប្តាហ៍សម្រាប់រយៈពេល ៤សប្តាហ៍ ដោយនាំយកតំបន់ហ្កាហ្សាស្ទ្រីបភាគច្រើន ដាក់នៅក្រោមការគ្រប់គ្រងរបស់អ៊ីស្រាអែលទាំងស្រុង។