លោកនាយករដ្ឋមន្ត្រី បេនចាមីន ណេតាន់យ៉ាហ៊ូ ( Benjamin Netanyahu) បាននិយាយកាលពីថ្ងៃព្រហស្បតិ៍ថា អ៊ីស្រាអែល បានចូលរួមនៅក្នុងកិច្ចពិភាក្សាដែលមានគោលបំណងដកកងកម្លាំងយោធា ចេញពីភាគខាងត្បូងប្រទេសស៊ីរី ដែលជាការទទួលស្គាល់យ៉ាងជាក់ស្តែងសម្រាប់ការទំនាក់ទំនងជាលើកដំបូងជាមួយរបបស៊ីរីថ្មី។

បន្ទាប់ពីអំពើហិង្សាដ៏ឃោរឃៅបង្កឡើងដោយក្រុមប្រកាន់និកាយ នៅក្នុងប្រទេសស៊ីរី កាលពីខែមុន លោក ណេតាន់យ៉ាហ៊ូ បានជួបជាមួយមេដឹកនាំជនភាគតិច Druze ម្នាក់ ក្នុងប្រទេសអ៊ីស្រាអែល ដោយបានធានាចំពោះមេដឹកនាំរូបនេះថា រដ្ឋាភិបាលរបស់ខ្លួន កំពុងចរចា ដើម្បីការពារសហគមន៍សាសនានេះ នៅក្នុងប្រទេសស៊ីរី។

លោកនាយករដ្ឋមន្ត្រី បាននិយាយថា៖«យើងកំពុងផ្តោតលើរឿងសំខាន់បីយ៉ាង៖ ការការពារសហគមន៍ Druze នៅក្នុងខេត្ត Sweida ប៉ុន្តែមិនត្រឹមតែនៅទីនោះប៉ុណ្ណោះទេ ថែមទាំងបង្កើតតំបន់គ្មានយោធាដែលលាតសន្ធឹងពីតំបន់ខ្ពង់រាប Golan Heights (ឆ្លងកាត់) ទៅដល់ភាគខាងត្បូងនៃទីក្រុងដាម៉ាស (Damascus) និងរួមទាំងខេត្ត Sweida និងការបង្កើតច្រករបៀងមនុស្សធម៌ ដើម្បីអនុញ្ញាតឲ្យដឹកជញ្ជូនជំនួយចូល»។

លោកបានបន្ថែមថា៖«ការពិភាក្សាទាំងនេះ កំពុងកើតឡើង នៅពេលនេះ»។ នេះបើយោងតាមវីដេអូដែលចែករំលែកដោយការិយាល័យរបស់លោកនាយករដ្ឋមន្ត្រី។