អ្នកជំនាញរបស់អង្គការសហប្រជាជាតិ ក្នុងនោះមានលោកស្រី Francesca Albanese អ្នករាយការណ៍ពិសេសរបស់អង្គការសហប្រជាជាតិទទួលបន្ទុកកិច្ចការដែនដីប៉ាឡេស្ទីន កំពុងជំរុញឲ្យរដ្ឋាភិបាលអ៊ីស្រាអែលស៊ើបអង្កេតការបាត់ខ្លួនដោយបង្ខំរបស់ជនជាតិប៉ាឡេស្ទីន ដែលបានទៅមជ្ឈមណ្ឌលមូលនិធិមនុស្សធម៌ហ្កាហ្សា (GHF)ដែលគាំទ្រដោយសហរដ្ឋអាមេរិក និងអ៊ីស្រាអែល ដើម្បីទទួលជំនួយស្បៀងអាហារ និងចាប់អ្នកទទួលទទួលខុសត្រូវ ឲ្យទទួលខុសត្រូវករណីបាត់ខ្លួនទាំងនោះ។

យោងតាមសេចក្តីថ្លែងការណ៍ អ្នកជំនាញ បានទទួលរបាយការណ៍អំពី «បុគ្គលមួយចំនួន ក្នុងនោះមាន កុមារម្នាក់ ដែលបានទៅកន្លែងចែកចាយជំនួយនៅច្រក Rafah ហើយត្រូវបានបាត់ខ្លួនដោយបង្ខំ»។     តួលេខបង្ហាញថា ទាហានអ៊ីស្រាអែលមាន «ជាប់ពាក់ព័ន្ធដោយផ្ទាល់ក្នុងការបាត់ខ្លួនដោយបង្ខំនៃមនុស្សដែលស្វែងរកជំនួយ»ពីមជ្ឈមណ្ឌលទាំងនោះ។ អង្គការសហប្រជាជាតិ ក៏បានព្រមានថា៖«ការកើនឡើងនូវរបាយការណ៍នៃការបាត់ខ្លួនដោយបង្ខំ នៅកន្លែងចែកចាយជំនួយ នឹងរារាំងបុគ្គលម្នាក់ៗពីការទទួលបានជំនួយស្បៀងអាហារសំខាន់ៗ ដែលបានឲ្យហានិភ័យនៃភាពអត់ឃ្លានកាន់តែធ្ងន់ធ្ងរឡើង» នៅក្នុងតំបន់នេះ។

សេចក្តីថ្លែងការណ៍ដែលចេញផ្សាយដោយសេវាសារព័ត៌មានរបស់អង្គការសហប្រជាជាតិ បានលើកឡើង ថា៖«អាជ្ញាធរអ៊ីស្រាអែល ត្រូវតែបញ្ជាក់ឲ្យច្បាស់អំពីជោគវាសនា និងទីកន្លែងលាក់ខ្លួនរបស់មនុស្សដែលបានបាត់ខ្លួន ហើយស៊ើបអង្កេតការបាត់ខ្លួនដោយបង្ខំឲ្យបានហ្មត់ចត់ និងមិនលម្អៀង ហើយដាក់ទោសជនល្មើស»។