នាយករដ្ឋមន្ត្រីជប៉ុន លោក Shigeru Ishiba និងនាយករដ្ឋមន្ត្រីឥណ្ឌា លោក Narendra Modi បានព្រមព្រៀងគ្នា នៅថ្ងៃសុក្រ (ទី២៩ ខែសីហា) នេះ ក្នុងការលើកកម្ពស់កិច្ចសហប្រតិបត្តិការសេដ្ឋកិច្ច និងសន្តិសុខឲ្យកាន់តែរឹងមាំបន្ថែមទៀត ខណៈដែលទីក្រុងតូក្យូ បានសង្កត់ធ្ងន់លើការមានតួនាទីសកលកាន់តែខ្លាំងឡើងៗរបស់ប្រទេសឥណ្ឌា។

បើយោងតាមប្រភពពីរដ្ឋាភិបាល បានឲ្យដឹងថា បន្ទាប់ពីមានកិច្ចពិភាក្សា នៅទីក្រុងតូក្យូ ប្រទេសជប៉ុន លោក Ishiba និងលោក Modi នឹងបង្ហាញ «ចក្ខុវិស័យរួម» ដែលគូសបញ្ជាក់ពីកិច្ចសហប្រតិបត្តិការរយៈពេល ១០ឆ្នាំខាងមុខ ដោយមានគោលដៅជំរុញការវិនិយោគរបស់ប្រទេសជប៉ុន នៅឥណ្ឌា ឲ្យដល់ ១០សែនកោដិយ៉េន (៦៨ពាន់លានដុល្លារ) និងបង្កើនការផ្លាស់ប្តូរបុគ្គលិកទៅវិញទៅមកដល់ ៥០០.០០០នាក់ ក្នុងរយៈពេល ៥ឆ្នាំខាងមុខ។

ប្រភពបានឲ្យដឹងទៀតថា មេដឹកនាំទាំង២ ក៏ត្រូវបានគេរំពឹងថា នឹងចេញសេចក្តីប្រកាសរួមដែលត្រូវបានកែសម្រួល ស្តីពីកិច្ចសហប្រតិបត្តិការសន្តិសុខ ដែលជាការធ្វើបច្ចុប្បន្នភាពលើកដំបូង ចាប់តាំងពីមានការព្រមព្រៀងក្នុងឆ្នាំ២០០៨ ដើម្បីពង្រីកសមយុទ្ធ រវាងកងកម្លាំងស្វ័យការពាររបស់ជប៉ុន និងយោធាឥណ្ឌា។ គេក៏រំពឹងផងដែរថា សេចក្តីថ្លែងការណ៍ ស្តីពីទំនាក់ទំនងជិតស្និទ្ធ នឹងត្រូវបានចេញជាសាធារណៈ។

បើយោងតាមរដ្ឋាភិបាលជប៉ុន បានឲ្យដឹងថា លោក Ishiba និងលោក Modi នឹងធ្វើសន្និសីទកាសែតរួមគ្នា បន្ទាប់ពីបញ្ចប់កិច្ចពិភាក្សា។ ប្រភពបានបញ្ជាក់ថា មេដឹកនាំនៃប្រទេសទាំង២ ក៏ត្រូវបានគេរំពឹងថា នឹងប្រកាសពីការចាប់ផ្តើមគំនិតផ្តួចផ្តើមទ្វេភាគីថ្មី ជុំវិញកិច្ចសហប្រតិបត្តិការលើកកម្ពស់បញ្ញាសិប្បនិម្មិត (AI) គាំទ្រដល់ការចាប់ផ្តើមអាជីវកម្ម និងការដោះស្រាយបញ្ហាប្រឈមផ្នែកសន្តិសុខសេដ្ឋកិច្ច ដូចជាការធានាឲ្យមានស្ថិរភាពនៃការផ្គត់ផ្គង់សារធាតុរ៉ែសំខាន់ៗជាដើម៕