ប្រធានគោលនយោបាយការបរទេសរបស់សហភាពអឺរ៉ុប (EU) លោកស្រី Kaja Kallas បាននិយាយនៅថ្ងៃសៅរ៍ (ទី៣០ ខែសីហា) នេះថា លោកស្រីមិនមានសុទិដ្ឋិនិយមនោះឡើយ ជុំវិញថា តើប្លុកនឹងចាត់វិធានការប្រឆាំងនឹងអ៊ីស្រាអែលដែរ ឬយ៉ាងណា ពាក់ព័ន្ធនឹងសង្គ្រាម នៅតំបន់ហ្កាហ្សា ដោយសារមានការខ្វែងគំនិតគ្នា រវាងរដ្ឋជាសមាជិក។

កិច្ចប្រជុំរដ្ឋមន្ត្រីការបរទេស នៅប្រទេសដាណឺម៉ាក នឹងពិភាក្សាអំពីសំណើផ្អាកផ្តល់មូលនិធិរបស់សហភាពអឺរ៉ុបដល់ក្រុមហ៊ុនថ្មីរបស់អ៊ីស្រាអែល ដែលជាការដាក់ទណ្ឌកម្មដំបូង ជុំវិញស្ថានភាព នៅតំបន់ហ្កាហ្សា។

ប៉ុន្តែរហូតមកដល់ពេលនេះ ប្លុកនេះបានមិនអាចប្រមូលបានសំឡេងគាំទ្រភាគច្រើនដែលត្រូវការ ដើម្បីឈានទៅដល់ចំណាត់ការនេះនោះទេ ដោយសូម្បីតែមិនអាចលើកឡើងនូវវិធានការខ្លាំងក្លាបន្ថែមទៀត ប្រឆាំងនឹងអ៊ីស្រាអែល។

នៅពេលចាប់ផ្តើមកិច្ចប្រជុំ នៅដាណឺម៉ាក លោកស្រី Kallas បានប្រាប់អ្នកសារព័ត៌មានថា៖ «ខ្ញុំមិនមានសុទិដ្ឋិនិយមខ្លាំងនោះទេ ហើយថ្ងៃនេះ យើងប្រាកដជានឹងមិនអនុម័តការសម្រេចឡើយ។ នេះបញ្ជូនសញ្ញាថា យើងមិនមានភាពចុះសម្រុងគ្នាឡើយ»។

ការបែកបាក់គ្នា នៅក្នុងសហភាពអឺរ៉ុប រវាងប្រទេសគាំទ្រអ៊ីស្រាអែល និងប្រទេសគាំទ្រប៉ាឡេស្ទីន បានមើលឃើញថា ប្លុកមានសមាជិក ២៧ប្រទេសនេះ ជារឿយៗមិនបានចេញវិធានការខ្លាំងក្លាអ្វីឡើយ នៅចំពោះវិបត្តិមនុស្សធម៌ដ៏ធ្ងន់ធ្ងរនៅក្នុងតំបន់ហ្កាហ្សា៕