ប្រធានគោលនយោបាយការបរទេសរបស់សហភាពអឺរ៉ុប (EU) លោកស្រី Kaja Kallas បាននិយាយនៅថ្ងៃសៅរ៍ (ទី៣០ ខែសីហា) នេះថា វាមិនអាចទៅរួចនោះទេក្នុងការដែលស្រមៃថា នឹងមានការប្រគល់ត្រលប់ទៅឲ្យរុស្ស៊ីវិញនូវទ្រព្យសម្បត្តិដែលត្រូវបានបង្កកនៅក្នុងប្លុកនេះ ប្រសិនបើទីក្រុងមូស្គូមិនបានផ្តល់សំណងដល់ការខូចខាត ក្នុងសង្គ្រាមនៅអ៊ុយក្រែនទេនោះ។

លោកស្រី Kallas បានប្រាប់អ្នកសារព័ត៌មាន នៅមុនកិច្ចប្រជុំរដ្ឋមន្ត្រីការបរទេស EU នៅទីក្រុង Copenhagen ប្រទេសដាណឺម៉ាកថា៖ «យើងមិនអាចស្រមៃបានឡើយ ដែលថា ប្រសិនបើមានបទឈប់បាញ់ ឬកិច្ចព្រមព្រៀងសន្តិភាព ដែលទ្រព្យសម្បត្តិទាំងនេះត្រូវបានប្រគល់ឲ្យរុស្ស៊ីវិញ ទាំងដែលប្រទេសនេះមិនបានបង់ប្រាក់សម្រាប់សំណងសង្គ្រាមទេនោះ»។

សហភាពអឺរ៉ុបលើកឡើងថា ទ្រព្យសម្បត្តិរុស្ស៊ីប្រហែល ២១០ពាន់លានអឺរ៉ូ (២៤៥ពាន់លានដុល្លារ) ត្រូវបានបង្កកនៅក្នុងប្លុក ក្រោមការដាក់ទណ្ឌកម្មលើទីក្រុងមូស្គូ ដោយសារការលុកលុយលើអ៊ុយក្រែន។

អ៊ុយក្រែន និងប្រទេសសហភាពអឺរ៉ុបមួយចំនួន រួមទាំងប៉ូឡូញ និងបណ្ដារដ្ឋបាល់ទិក បានអំពាវនាវឲ្យសហភាពអឺរ៉ុបរឹបអូសទ្រព្យសម្បត្តិ និងប្រើប្រាស់ទ្រព្យសម្បត្តិទាំងនោះ ដើម្បីគាំទ្រដល់ទីក្រុងគីវ។

ប៉ុន្តែប្រទេសសមាជិកធំៗរបស់ EU គឺបារាំង និងអាល្លឺម៉ង់ រួមជាមួយបែលហ្ស៊ិកផងដែរ ដែលកាន់កាប់ទ្រព្យសកម្មនេះភាគច្រើន បានបដិសេធការអំពាវនាវបែបនេះ៕