ប្រធានាធិបតីចិន លោក Xi Jinping បានថ្លែងប្រាប់មេដឹកនាំពិភពលោកប្រមាណ ២០រូប ក្នុងកិច្ចប្រជុំកំពូលនៅទីក្រុងធានជីន ភាគខាងជើងប្រទេសចិនថា វេទិកាសន្តិសុខរបស់អង្គការសហប្រតិបត្តិការសៀងហៃ (SCO) ឥឡូវនេះ មានភារកិច្ច "ទទួលខុសត្រូវកាន់តែធំ" សម្រាប់ការការពារសន្តិភាព និងស្ថិរភាពនៅក្នុងតំបន់។

លោក Xi ក៏បានគូសបញ្ជាក់ពីបេសកកម្មដ៏សំខាន់របស់ប្លុក SCO សម្រាប់ការអភិវឌ្ឍ និងវិបុលភាពនៃរដ្ឋជាសមាជិករបស់ខ្លួន ខណៈលោកធ្វើជាម្ចាស់ផ្ទះ និងថ្លែងសុន្ទរកថាទៅកាន់អង្គប្រជុំកម្រិតខ្ពស់ ក្នុងពិធីជប់លៀងមួយកាលពីល្ងាចថ្ងៃអាទិត្យ (៣១ សីហា)។ ទីភ្នាក់ងារសារព័ត៌មានរដ្ឋចិន ស៊ីនហួ បានដកស្រង់សម្ដីលោក Xi ដែលប្រាប់មេដឹកនាំក្នុងកិច្ចប្រជុំថា ជំនួបកំពូល SCO នេះ មានតួនាទីសំខាន់ក្នុងការកសាងការឯកភាពក្នុងចំណោមភាគីទាំងអស់ និងជំរុញសន្ទុះក្នុងកិច្ចសហប្រតិបត្តិការ។

ក្នុងសុន្ទរកថាបើកកិច្ចប្រជុំនៅថ្ងៃចន្ទ (១ កញ្ញា) នេះ លោក Xi បានថ្លែងថា SCO បានកំណត់គំរូសម្រាប់ទំនាក់ទំនងអន្តរជាតិថ្មីមួយ ហើយវេទិកានេះប្រឆាំងដាច់ខាតនូវការជ្រៀតជ្រែកពីខាងក្រៅ។

ក្នុងចំណោមភ្ញៀវកិត្តិយសដែលគួរឱ្យកត់សម្គាល់បំផុតក្នុងកិច្ចប្រជុំកំពូលរយៈពេលពីរថ្ងៃនោះ គឺនាយករដ្ឋមន្ត្រីឥណ្ឌា លោក Narendra Modi ដែលកំពុងបំពេញទស្សនកិច្ចជាលើកដំបូងនៅប្រទេសចិន ចាប់តាំងពីឆ្នាំ២០១៨ មក ហើយក៏មានការចូលរួមពីប្រធានាធិបតីរុស្ស៊ី លោក Vladimir Putin ផងដែរ។

ចិន និងរុស្ស៊ី បានហៅប្លុក SCO ថាជាជម្រើសជំនួសសម្ព័ន្ធយោធារបស់ណាតូ។ កិច្ចប្រជុំកំពូល SCO នៅឆ្នាំនេះគឺជាលើកទីដំបូងហើយចាប់តាំងពីប្រធានាធិបតីអាមេរិក លោក Donald Trump បានវិលត្រឡប់ទៅកាន់កៅអីសេតវិមានវិញសម្រាប់អាណត្តិទីពីរ ដែលចាប់ផ្តើមនៅខែមករា ឆ្នាំ២០២៥៕